आर्थिक सर्वेक्षण २०८२/०८३ ले २९५ मृगौला र १५ कलेजो प्रत्यारोपण सफलतापूर्वक सम्पन्न भएको देखाएको छ। यस तथ्याङ्कले नेपालको स्वास्थ्य सेवा क्षेत्रमा भएको ठूलो छलाङलाई प्रस्ट पार्छ। जटिल शल्यक्रियाका लागि विदेश जानुपर्ने अवस्था क्रमशः घट्दै गएको छ।
औषधि व्यवस्थापनतर्फ पनि नेपालले उत्पादनमा वृद्धि गरेको छ। हालसम्म दर्ता भएका २२ हजार ३ सय ५ ब्राण्डमध्ये १३ हजार ५ सय ९४ वटा स्वदेशी उत्पादन हुन्। यसले औषधिको आत्मनिर्भरता बढाउन सहयोग पुऱ्याएको छ।
रोग नियन्त्रणका क्षेत्रमा पनि महत्वपूर्ण काम भएको छ। १४९ स्थानीय तहमा ‘क्षयरोग मुक्त नेपाल अभियान’ सञ्चालन गरिएको छ। २७ हजार ५ सय २६ जना एचआइभी सङ्क्रमितले नियमित एन्टिरेट्रोभाइरल उपचार पाइरहेका छन्। यी प्रयासहरूले सार्वजनिक स्वास्थ्य सुधारमा योगदान पुऱ्याएको छ।
