चालु आर्थिक वर्षको फागुनसम्म उद्योगहरूमा थप ३ खर्ब ८९ अर्ब ७४ करोड रुपैयाँ लगानी स्वीकृत भएको छ। यसबाट करिब ३९ हजार ५४६ नयाँ रोजगारी सिर्जना हुने अनुमान छ। यो गत आर्थिक वर्षको सोही अवधिको तुलनामा सुधार हो।
अर्थ मन्त्रालयले प्रस्तुत गरेको आर्थिक सर्वेक्षण २०८२-८३ अनुसार, चालु आवको फागुनसम्म कुल ३७ खर्ब २७ अर्ब ५४ करोड रुपैयाँ बराबरको लगानी स्वीकृत भएको छ। ठूला, मझौला र साना उद्योगको हिस्सा क्रमशः १३.९, २०.० र ६६.१ प्रतिशत छ।
गत आर्थिक वर्षको सोही अवधिमा ४३८ उद्योगका लागि १ खर्ब ७१ अर्ब ३६ करोड रुपैयाँ लगानी स्वीकृत भएको थियो। यसबाट २३ हजार ६४ प्रत्यक्ष रोजगारी सिर्जना हुने अनुमान थियो। यस वर्ष दर्ता भएका ९२१ नयाँ उद्योगबाट रोजगारीमा वृद्धि देखिएको छ।
उद्योग दर्ताको संख्यामा करिब १२ प्रतिशतले वृद्धि भएको छ। गत आर्थिक वर्षको फागुनसम्म ९ हजार ९६३ उद्योग दर्ता भएकामा यस वर्ष ११ हजार १४० उद्योग दर्ता भएका छन्।
दर्ता भएका उद्योगमध्ये उत्पादनमूलक उद्योगको हिस्सा ३३.३ प्रतिशत छ। सेवामूलक उद्योग २३.९ प्रतिशत, पर्यटन उद्योग २३.५ प्रतिशत र अन्य उद्योग १९.३ प्रतिशत हिस्सा ओगटेका छन्। पूर्वाधार क्षेत्रका उद्योगको हिस्सा ०.७ प्रतिशत छ।
लगानी स्वीकृतिका आधारमा ऊर्जामूलक उद्योगमा ५५.१ प्रतिशत लगानी स्वीकृत भएको छ। उत्पादनमूलक उद्योगमा १९.५ प्रतिशत र खनिज उद्योगमा ०.३ प्रतिशत लगानी स्वीकृत भएको छ।
सार्वजनिक संस्थानमा सरकारको कुल लगानी ७ खर्ब ९८ अर्ब ५६ करोड रुपैयाँ पुगेको छ। गत आर्थिक वर्ष २०८१/८२ मा सरकारले यी संस्थानहरूबाट ८ अर्ब ३७ करोड ७६ लाख रुपैयाँ लाभांश प्राप्त गर्यो। यो लगानीको तुलनामा २.३ प्रतिशत हो।
आर्थिक सर्वेक्षणले निर्माण क्षेत्रमा सुधार देखाएको छ। गत वर्ष ०.९६ प्रतिशतको झिनो वृद्धिमा रहेको यो क्षेत्र चालु आवमा २.२१ प्रतिशत पुग्ने प्रक्षेपण छ। यसले कुल गार्हस्थ्य उत्पादन (जीडीपी) मा निर्माण क्षेत्रको योगदान ५.३५ प्रतिशतबाट बढेर ५.५२ प्रतिशत पुग्ने अनुमान छ। उत्पादनमूलक उद्योगको योगदान ५.६६ प्रतिशतबाट बढेर ५.७२ प्रतिशत पुग्ने प्रक्षेपण छ।
