दुग्ध विकास संस्थान (डीडीसी) को लैनचौरस्थित केन्द्रीय कार्यालयमा नेपाल प्रहरीको केन्द्रीय अनुसन्धान ब्यूरो (सीआईबी)ले छापा मारेको छ। आर्थिक अनियमितताको आशंकामा सीआईबीले संस्थाको केन्द्रीय कार्यालयमा पुगेर अनुसन्धान प्रक्रिया अघि बढाएको हो।
बुधबार दिउँसो डीडीसी कार्यालय पुगेको सीआईबी टोलीले प्रारम्भिक अनुसन्धानका क्रममा पाँच कर्मचारीका मोबाइल उपकरण नियन्त्रणमा लिएको छ। दूध खरिद–बिक्रीसँग सम्बन्धित केही कागजात पनि अध्ययनका लागि संकलन गरिएको छ। सीआईबीले पछिल्ला तीन वर्षयताका निर्णय र अभिलेख उपलब्ध गराउन भनेको छ।
स्रोतका अनुसार अनुसन्धान टोलीले कार्यालयमा पुगेर आवश्यक विवरण र अभिलेखको परीक्षण गरेको थियो। घटनासम्बन्धी थप तथ्य संकलन गर्ने काम जारी छ।
यसैबीच, अनुसन्धान टोली कार्यालय पुगेका बेला डीडीसीका महाप्रबन्धक डा. शरणकुमार पाण्डे भने कार्यालयमा उपस्थित थिएनन्। पाण्डेले आफू मन्त्रालयको काममा रहेको र कागजात संकलन गरिएको जानकारीपछि घटनाबारे थप बुझ्ने बताएका छन्।
यता, डीडीसीले किसानलाई करिब ५० करोड रूपैयाँ भुक्तानी गर्न बाँकी रहेको बताइएको छ। सरकारी स्वामित्वको यो संस्थाले किसानबाट दूध संकलन गरी बजारमा बिक्री गर्दै आएको छ।
