बाराको सिम्रौनगढ नगरपालिकामा गत वैशाख १४ गतेको आँधीले ४०० किसानको बाली नष्ट भएपछि क्षतिपूर्ति नपाएको भन्दै किसानहरूले नगरपालिकाको मुख्य गेटमा ताल्चा लगाएका छन्।
पीडित किसानहरूले क्षतिपूर्तिका लागि पटकपटक आग्रह गरे पनि नगरपालिकाले राहत वितरणमा ढिलाइ गरेको आरोप लगाएका छन्। नगरप्रमुख किशोरीप्रसाद कलवारले मापदण्ड तयार गरी कागजात बुझाउन आग्रह गरेका थिए; किसानहरूले प्रक्रिया पूरा गरे पनि विभिन्न बहानामा ढिलाइ भएको गुनासो छ।
रानीवास बजारबाट सुरु भएको जुलुस अमृतगंज, जानकीनगर हुँदै सिम्रौनगढ बजार परिक्रमा गरी नगरपालिका कार्यालय पुग्यो। प्रदर्शनकारीहरूले नगरप्रमुख र वडाध्यक्षविरुद्ध नाराबाजी गरे। सुरक्षाकर्मी र प्रदर्शनकारीबीच ध’क्कामु’क्की भयो।
किसान सङ्घर्ष समितिका अध्यक्ष ध्रुवप्रसाद कुशवाहाले आवश्यक कागजात बुझाइसक्दा पनि क्षतिपूर्ति वितरणमा ढिलाइ भएकाले आन्दोलन गर्न बाध्य भएको बताए। माग पूरा नभएसम्म आन्दोलन जारी रहने चेतावनी उनले दिएका छन्।
नगरपालिका कार्यालयभित्र कार्यपालिका बैठक चलिरहेका बेला नगरप्रमुख कलवार, उपप्रमुख नज्मु शेहर, जनप्रतिनिधि, कर्मचारी तथा सेवाग्राहीहरू भवनभित्रै रोकिए। नगरप्रमुख कलवारले क्षतिपूर्तिसम्बन्धी विषयमा छलफल भइरहेको बताएका छन्।
सङ्घर्ष समितिका सचिव रामप्रवेश कुशवाहाका अनुसार २६० जना कृषकका कागजात स्वीकृत भई नगरपालिकामा बुझाइएको छ। प्रतिकट्ठा पाँच हजार रुपैयाँका दरले राहत दिने सहमति भएको छ।
कागजात अपूर्ण भएका केही कृषक राहत सूचीबाट बाहिरिएका छन्। बटैयामा खेती गर्ने जोतहाहरू जग्गाधनीले कागजात उपलब्ध नगराउँदा क्षतिपूर्तिबाट वञ्चित भएको गुनासो छ। प्रदर्शनका क्रममा महिला नगर प्रहरी सविता कुमारी घाइते भइन्।
