सिंगापुरमा जारी एसियन गेम्स पुरुष क्रिकेट छनोटमा नेपालले चीनमाथि २२१ रनको फराकिलो र ऐतिहासिक जित दर्ता गरेको छ। कुशल भुर्तेलको विष्फोटक शतक र कुशल मल्लको उत्कृष्ट अलराउन्ड प्रदर्शनले नेपाललाई समूह ‘ए’ को पहिलो खेलमा सहज जित दिलाएको हो।
टस जितेर पहिले ब्याटिङ गरेको नेपालले निर्धारित २० ओभरमा २ विकेट गुमाउँदै ३१३ रनको विशाल योगफल खडा गरेको थियो। यो टी–२० आईमा नेपालको दोस्रो उच्च योगफल हो। नेपालका लागि ओपनिङ ब्याटर कुशल भुर्तेलले ४३ बलमा ५ चौका र १६ छक्का प्रहार गर्दै १२९ रनको उत्कृष्ट इनिङ खेले।
त्यस्तै, कुशल मल्लले ४७ बलमा ८ चौका र ५ छक्का प्रहार गर्दै अविजित ८५ रनको योगदान दिए। कप्तान रोहित पौडेलले पनि २१ बलमा ५ चौका र ७ छक्कासहित अविजित ६९ रन जोडे। आसिफ शेख ११ रनमा आउट भए।
३१४ रनको विशाल लक्ष्य पछ्याएको चीन नेपाली बलरहरूको कसिलो बलिङसामु निरिह साबित भयो। चिनियाँ टोली १९.२ ओभरमा ९२ रनमा अलआउट भयो। चीनका लागि शेन्जियान झेङले सर्वाधिक ३१ रन बनाए भने अन्य ब्याटरले उल्लेख्य प्रदर्शन गर्न सकेनन्।
नेपालको बलिङतर्फ कुशल मल्लले मात्र १.२ ओभरमा कुनै रन नदिई ३ विकेट लिएर उत्कृष्ट प्रदर्शन गरे। सन्दीप लामिछाने र सोमपाल कामीले समान २–२ विकेट लिए भने नन्दन यादवले १ विकेट झारे।
