राष्ट्रिय स्वतन्त्र पार्टी (रास्वपा) का सभापति रवि लामिछाने आज भारत भ्रमणमा जाँदै छन्। भारतीय जनता पार्टी (भाजपा) को औपचारिक निमन्त्रणामा उनी जेठ १८ देखि २२ गतेसम्म पाँच दिने भ्रमणका लागि नयाँदिल्ली प्रस्थान गर्ने कार्यक्रम छ।
भ्रमणका क्रममा लामिछानेले भाजपाका शीर्ष नेताहरूसँग राजनीतिक भेटघाट गर्नेछन्। उनले भारतमा बसोबास गरिरहेका नेपाली समुदाय र पार्टीका शुभेच्छुकहरूसँग पनि संवाद गर्नेछन्।
रास्वपाले आइतबार राति जारी गरेको विज्ञप्तिमा सभापति लामिछानेले उच्चस्तरीय राजनीतिक तथा कूटनीतिक भेटघाट गर्ने उल्लेख छ। भाजपाले पनि लामिछानेको भ्रमणबारे आधिकारिक जानकारी सार्वजनिक गरिसकेको छ।
भ्रमण टोलीमा पत्नी निकिता पौडेल, सहमहामन्त्री विपिन आचार्य, सचिवालय सदस्य दीपक बोहोरा र प्रदीप आचार्य सहभागी हुनेछन्। उनीहरूसँगको भेटघाटको समय भने अझै तय भइसकेको छैन।
