मध्यपूर्वमा चर्किएको अमेरिका-इरान तनावले होर्मुज जलसन्धि हुँदै हुने तेल ढुवानी जोखिममा पार्दा बुधबार ब्रेन्ट क्रुडको मूल्य प्रतिब्यारेल ९५ अमेरिकी डलर नाघेको छ। यो छ सातापछि पहिलो पटक हो।
अन्तर्राष्ट्रिय बेन्चमार्क ब्रेन्ट क्रुडको मूल्य कारोबारका क्रममा ९५ डलरभन्दा माथि पुगेर केही घटेको थियो। अमेरिकी ‘वेस्ट टेक्सास इन्टरमिडियट’ (डब्लुटीआई) क्रुडको मूल्यमा पनि वृद्धि देखिएको छ।
विश्लेषकहरूका अनुसार अमेरिका र इरानबीचको सैन्य तनाव तथा होर्मुज र बाब अल–मान्देब जलसन्धिमा बढेको ढुवानी जोखिमले आपूर्ति अवरोधको आशङ्का बढाएको छ।
तत्कालीन आपूर्तिमा देखिएको कमी र कच्चा तेलको अल्पकालीन मागमा भएको वृद्धिले पनि मूल्य बढाएको बजार सहभागीहरूले बताएका छन्।
मध्यपूर्वको तनाव थप बढेमा भू–राजनीतिक जोखिमले तेलको मूल्यमा थप दबाब पर्ने र विश्वव्यापी ऊर्जा बजार प्रभावित हुने चेतावनी विश्लेषकहरूले दिएका छन्।
