मेची राजमार्गको राजदुवाली खण्ड पूर्ण रूपमा अवरुद्ध भएपछि इलाम नगरपालिकाले नगर क्षेत्रलाई ‘विपद् संकटग्रस्त क्षेत्र’ घोषणा गर्न सरकारसमक्ष सिफारिस गरेको छ। प्रमुख केदार थापाको अध्यक्षतामा बसेको सर्वपक्षीय भेलाले जिल्ला प्रशासन कार्यालयमार्फत गृह मन्त्रालयमा सिफारिस पठाउने निर्णय गर्यो।
भेलामा निवर्तमान सांसद महेश बस्नेत, प्रमुख जिल्ला अधिकारी लक्ष्मण ढकाल, सडक डिभिजन कार्यालयका प्रमुख पवन भट्टराई सहभागी थिए। विगत वर्षदेखि पहिरो र जमिन भासिने समस्याले ग्रस्त राजदुवाली खण्ड यस वर्ष पूर्ण रूपमा बन्द भएको छ।
वैकल्पिक मार्गका बेलिब्रिज गत वर्ष बाढीले बगाएपछि ती मार्ग पनि सञ्चालनमा छैनन्। सडक अवरुद्ध हुँदा इलाम, पाँचथर र ताप्लेजुङका बासिन्दाले दैनिक उपभोग्य वस्तु, औषधि र ग्यासको अभाव झेल्नुपरेको छ। झापा रिफर गरिएका बिरामीको उद्धारमा कठिनाइ भएको छ। विद्यार्थीहरूको पठनपाठनसमेत अवरुद्ध छ।
राजदुवाली खण्ड पुनः सञ्चालन र वैकल्पिक मार्ग सुधार गर्न विशेष सरकारी हस्तक्षेप आवश्यक छ। इलाम उद्योग वाणिज्य संघलाई दैनिक उपभोग्य सामग्रीको आपूर्ति सुनिश्चित गर्न अनुरोध गरिनेछ।
पुवाखोला जलविद्युत् आयोजनाको सुरुङमार्ग र हेडट्याङ्कमा चुहावटको आशंका छ। गोलाखर्क–राजदुवाली क्षेत्रमा निरन्तर पहिरो र जमिन भासिने घटनाले प्राविधिक अध्ययनको माग गरेको छ। नेपाल विद्युत् प्राधिकरणलाई आवश्यक मर्मत गर्न अनुरोध गरिनेछ।
मेची राजमार्गलाई इलाम, पाँचथर र ताप्लेजुङको ‘जीवनरेखा’ भन्दै बैठकले यातायात सञ्चालन छिटो पुनःस्थापना गर्न माग गरेको छ। वैकल्पिक मार्ग सुरक्षित बनाउन र प्रभावित नागरिकलाई राहत तथा अत्यावश्यक सेवा सुनिश्चित गर्न संघीय सरकारसँग तत्काल प्रभावकारी पहलको माग गरिएको छ।
