ताजा अपडेट: दशैँलगत्तै मधेश सरकारबाट एमाले बाहिरियो, मुख्यमन्त्री यादवलाई विश्वासको मतको चुनौती
मधेस प्रदेश सरकारबाट नेकपा एमाले बाहिरिएपछि मुख्यमन्त्री कृष्णप्रसाद यादव नेतृत्वको सरकार अल्पमतमा परेको छ। शुक्रबार एमालेबाट सरकारमा सहभागी चार मन्त्रीले सामूहिक राजीनामा दिए। एमालेका प्रमुख सचेतक हरिनारायण महतोका अनुसार, चारै जना मन्त्रीले एमाले संसदीय दलको निर्देशनअनुसार मुख्यमन्त्री कृष्णप्रसाद यादवसमक्ष राजीनामा पत्र बुझाएका थिए। उनीहरूले प्रदेश प्रमुख सुरेन्द्रलाभ कर्णलाई समेत राजीनामा बुझाएका छन्।
राजीनामा दिने मन्त्रीहरूमा श्रम तथा यातायातमन्त्री शारदादेवी थापा, खेलकुद तथा समाजकल्याणमन्त्री लखनदास, भौतिक पूर्वाधार विकासमन्त्री मोहम्मद समीर र शिक्षा तथा संस्कृतिमन्त्री मनोजकुमार सिंह छन्। एमाले मधेस प्रदेश संसदीय दलका नेता सरोजकुमार यादवले सरकार गठनका क्रममा भएको सहमति कार्यान्वयन नभएकाले समर्थन फिर्ता लिएको बताए।
एमालेको बहिर्गमनले मुख्यमन्त्री यादवलाई विश्वासको मतको चुनौती
मधेस प्रदेशमा हाल नेपाली कांग्रेस संसदीय दलका नेता कृष्णप्रसाद यादवको नेतृत्वमा कांग्रेस, एमाले र नेपाली कम्युनिष्ट पार्टी सम्मिलित गठबन्धन सरकार थियो। २०८२ मंसिर १९ गते कृष्णप्रसाद यादव मधेस प्रदेशको छैटौं मुख्यमन्त्रीमा नियुक्त भएका थिए। उनलाई कांग्रेसका २२, जसपा नेपालका १८, जनमत पार्टीका १३, माओवादी केन्द्रका ९, लोसपाका ८ र एकीकृत समाजवादीका ७ सांसदले समर्थन जनाएका थिए। प्रदेशसभामा एमालेका २४ सांसद छन्। एमालेको समर्थन फिर्तासँगै मुख्यमन्त्री यादवको सरकारले बहुमत गुमाएको छ। उनले ३० दिनभित्र प्रदेशसभामा विश्वासको मत लिनुपर्ने संवैधानिक बाध्यता आउन सक्छ।
मधेस प्रदेशमा नयाँ सत्ता समीकरणको अनिश्चितता
एमाले सरकारबाट बाहिरिएसँगै मधेस प्रदेशमा अब नयाँ सरकार गठनको समीकरणबारे अन्योल बढेको छ। केन्द्रको राजनीतिक निर्णयअनुसार प्रदेशमा कसको नेतृत्वमा सरकार बन्ने भन्ने विषय अझै टुङ्गिएको छैन। एमालेबाहेक कांग्रेससहित अन्य दलहरू मिलेर सरकार गठन गर्ने सम्भावना देखिए पनि त्यसका लागि दलहरूबीचको सहमति र प्रदेशसभाको अंकगणित निर्णायक हुनेछ। मधेस प्रदेशसभामा सीके राउत नेतृत्वको जनमत पार्टीसहित विभिन्न मधेसी दलहरूको पनि प्रतिनिधित्व छ। जनमत पार्टीका १३ सांसदले नयाँ गठबन्धन निर्माणमा निर्णायक भूमिका खेल्न सक्नेछन्। मुख्यमन्त्री यादवले कहिले विश्वासको मत लिनेछन् भन्ने मिति तोकिएको छैन।
यसअघि: एमाले मधेश सरकारबाट बाहिरियो: जनकपुरधाममा नयाँ सत्ता समीकरणको कसरत सुरु
