सुनसरीको देवानगञ्जमा दुई समुदायबीचको झडप र त्यसपछिको गोलीकाण्डले सिरहा, धनुषा र पर्सासम्म तनाव फैलाएको छ। घटनामा दुई जनाको मृत्यु भएको छ भने विभिन्न जिल्लामा कर्फ्यू र निषेधाज्ञा जारी गरिएको छ।
साउन ११ गते देवानगञ्ज गाउँपालिका–३ कप्तानगञ्जमा डिजे बजाउने विषयलाई लिएर झडप भएको थियो। प्रहरीको गोली लागेर २४ वर्षीय ओमप्रकाश मेहताको घटनाकै राति मृत्यु भयो। सोही घटनामा घाइते भएका २२ वर्षीय जयप्रकाश मेहताको बिहीबार विराटनगरस्थित न्युरो अस्पतालमा उपचारका क्रममा निधन भयो। यससँगै मृतकको संख्या दुई पुगेको छ। जयप्रकाशको मृत्युपछि स्थानीयमा सरकार र सुरक्षा निकायप्रति आक्रोश चर्किएको छ।
गृहमन्त्री स्वयं सुनसरी पुगेर स्थानीय प्रशासन, सुरक्षा अधिकारी र जनप्रतिनिधिसँग छलफल गर्दै शान्ति कायम राख्न सबै पक्षलाई संयम अपनाउन आग्रह गरे।
सुनसरीको घटनापछि तनाव धनुषा, सिरहा र पर्सासम्म फैलिएको छ। धनुषामा प्रशासनले कर्फ्यू आदेश जारी गरेको छ। सिरहाको गोलबजारमा प्रदर्शन उग्र बन्दा सुरक्षाकर्मीको गोली लागेर गणेश यादवको मृत्यु भयो। प्रदर्शनकारीले गोलबजारस्थित एबी मलमा आगजनी गरे। जिल्लाका विभिन्न स्थानमा कर्फ्यू जारी गरिएको छ।
पर्साको वीरगन्जमा पनि सिरहाको घटनापछि युवाहरू सडकमा उत्रिए। जिल्ला सुरक्षा समितिले साँझ ५ बजेदेखि शुक्रबार बिहान ६ बजेसम्म निषेधाज्ञा जारी गरे पनि माइस्थान, घण्टाघर, आदर्शनगरलगायत क्षेत्रमा प्रदर्शन जारी छ। प्रदर्शनकारीले दोषीलाई कारबाहीको माग गर्दै नेपाल बन्दको घोषणासमेत गरेका छन्।
यसैबीच, प्रधानमन्त्री बालेन्द्र (बालेन) शाहले राष्ट्रका नाममा सम्बोधन गर्दै नागरिकलाई संयम अपनाउन, अफवाहमा विश्वास नगर्न र सामाजिक सद्भाव जोगाउन आग्रह गरे। उनले सरकार शान्ति सुरक्षा कायम गर्न प्रतिबद्ध रहेको र दोषीलाई कानुनी दायरामा ल्याइने बताए। सम्बोधनलगत्तै प्रधानमन्त्रीले राष्ट्रपति रामचन्द्र पौडेलसँग भेटवार्ता गरी विकसित घटनाक्रमबारे छलफल गरे।
राष्ट्रिय सुरक्षा परिषद्को बैठकले पनि विकसित परिस्थितिको समीक्षा गर्दै सुरक्षा निकायबीच समन्वय थप प्रभावकारी बनाउने निर्णय गरेको छ।
यस घटनाक्रमले सामाजिक सञ्जालको प्रभावलाई पनि पुनः केन्द्रमा ल्याएको छ। पुष्टि नभएका सूचना, उत्तेजक भिडियो र भ्रामक प्रचार केही घण्टामै स्थानीय घटनालाई राष्ट्रिय तनावमा बदल्ने माध्यम बनेका छन्।
मधेस प्रदेश प्रहरी कार्यालयले एसपी भेषराज रिजालको नेतृत्वमा तीन सदस्यीय छानबिन समिति गठन गरेको छ। समितिले गोली चल्नुको कारण, घटनाक्रम, संलग्न पक्ष र प्रहरीको भूमिकाबारे अध्ययन गरेर प्रतिवेदन बुझाउनेछ।
दीर्घकालीन समाधानका लागि निष्पक्ष अनुसन्धान, कानुनी कारबाही, स्थानीय समुदायबीच संवाद, जिम्मेवार राजनीतिक नेतृत्व र अफवाह नियन्त्रण अनिवार्य रहेको विश्लेषण गरिएको छ।
