रौतहटको देवाही गोनाही नगरपालिका–२ लक्ष्मिनियास्थित लालबकैया नदीमा नुहाउने क्रममा तीन बालबालिका बेपत्ता भएका छन्। उनीहरूको खोजीका लागि गोताखोरसहितको सुरक्षा टोली खटिएको छ।
मंगलबार दिउँसो करिब १:५० बजे नदीमा नुहाउन गएका १०/१० वर्षका तीन बालबालिका एकैसाथ बेपत्ता भएका हुन्। घटनाको खबर पाउनासाथ नेपाल प्रहरी, सशस्त्र प्रहरी र स्थानीय गोताखोरको संयुक्त टोली घटनास्थल पुगेर खोजी कार्यलाई तीव्रता दिएको छ।
बेपत्ता हुनेहरूमा स्थानीय शेख अमरे आलमका १० वर्षीय छोरा मो. रमतुल्लाह, शेख खुरसेदकी १० वर्षीया छोरी रौशन खातुन र शेख ओसि अख्तरकी १० वर्षीया छोरी सवनम खातुन रहेका छन्। स्थानीयवासीको सहयोगमा सुरक्षाकर्मी र गोताखोरको टोलीले नदीमा खोजी कार्य जारी राखेको छ।
