रौतहटको चन्द्रपुर नगरपालिका-७ स्थित रङ्गपुर साझेदारी वन क्षेत्रबाट २४.७० क्युबिक फिट सालको गोलिया काठसहित एक व्यक्ति पक्राउ परेका छन्। आइतबार राति करिब ९ बजे संयुक्त वन गस्ती टोलीले नयाँबस्ती कटानी क्षेत्रमा काठ ओसारपसार गरिरहेको अवस्थामा उनलाई नियन्त्रणमा लिएको हो।
गस्ती टोलीले घटनास्थलबाट ५ थान सालको गोलिया काठ, तीन वटा साइकल र एउटा आरा बरामद गरेको छ। पक्राउ परेका व्यक्ति चन्द्रपुर नगरपालिका-७ नयाँबस्ती कटानीका स्थानीय बासिन्दा हुन्। वन कार्यालयले अनुसन्धान प्रक्रियामा रहेकाले उनको नाम खुलाएको छैन।
नियन्त्रणमा लिइएका व्यक्ति, जफत गरिएको काठ तथा सामग्री थप अनुसन्धान र कारबाहीका लागि डिभिजन वन कार्यालय रौतहटमा बुझाइएको छ। वन क्षेत्रमा अवैध कटान र काठ चोरी-तस्करी नियन्त्रण गर्न वन कार्यालयले रातिको समयमा पनि नियमित गस्ती गर्दै आएको छ।
यस अभियानमा डिभिजन वन कार्यालय रौतहट, चन्द्रपुर सब-डिभिजन वन कार्यालय, रङ्गपुर साझेदारी वन, सशस्त्र प्रहरी बेस सन्तपुर, प्रहरी चौकी बनबहुअरी र प्रहरी चौकी सन्तपुरका कर्मचारीहरूको सहयोग थियो। वन कार्यालयले वन संरक्षण तथा अवैध काठ कटान र ओसारपसार नियन्त्रणका लागि गस्ती र निगरानीलाई निरन्तरता दिने जनाएको छ।
