सर्लाहीको हरिपुर नगरपालिका–८ जगतपुरमा शनिबार बिहान भ्यानको ठक्करबाट मोटरसाइकल चालकको मृत्यु भएको छ। नवलपुर–मलंगवा सडकखण्डमा भएको उक्त दुर्घटनामा मलंगवा नगरपालिका–७ गणेशियाका ३० वर्षीय अरविन्द साहको ज्यान गएको हो।
शनिबार बिहान करिब ८:१५ बजेको समयमा नवलपुरबाट मलंगवातर्फ आउँदै गरेको ना.१ ज ६३०८ नम्बरको भ्यानले विपरीत दिशाबाट जाँदै गरेको मधेश प्रदेश ०२–०१० प २२२१ नम्बरको मोटरसाइकललाई ठक्कर दिएको थियो।
ठक्करबाट गम्भीर घाइते भएका साहलाई उपचारका लागि प्रादेशिक अस्पताल मलंगवा पुर्याइएको थियो। अस्पतालमा उपचारकै क्रममा चिकित्सकले उनलाई मृत घोषणा गरेका थिए।
दुर्घटनापछि सम्पर्कविहीन बनेका भ्यान चालक ३३ वर्षीय नजामुदिन बैठा भने प्रहरीको सम्पर्कमा आएका छन्। प्रहरीले दुवै सवारीसाधन नियन्त्रणमा लिएर घटनाबारे थप अनुसन्धान गरिरहेको जनाएको छ।
मधेश प्रदेशमा सवारी दुर्घटनाको अवस्था
सर्लाहीमा सवारी दुर्घटना बढ्दो क्रममा छ। आर्थिक वर्ष २०८०/०८१ मा मात्रै ६२ जनाको सवारी दुर्घटनामा मृत्यु भएको तथ्यांक छ। यस्तै, आर्थिक वर्ष २०८१/०८२ को चैत मसान्तसम्ममा ६२२ सवारी दुर्घटना भई ३७ जनाको मृत्यु र ११०१ जना घाइते भएका छन्। यसरी हेर्दा प्रदेशमा सडक सुरक्षाको अवस्था चिन्ताजनक देखिन्छ।
मधेश प्रदेशमा सडक सुरक्षाबारे सरोकारवाला निकायहरूले विभिन्न कार्यक्रमहरू आयोजना गर्दै आएका छन्। प्रादेशिक सडक ऐन, २०७६ ले सडकहरूको स्तरोन्नति र सुरक्षालाई सम्बोधन गर्ने प्रयास गरेको भए पनि दुर्घटनाहरू भने रोकिएका छैनन्।
