ताजा अपडेट: उत्तर कोरियालाई ब्यालिस्टिक मिसाइल परीक्षण तत्काल रोक्न दक्षिण कोरियाको माग
उत्तर कोरियाले सोमबार पूर्वी समुद्रतर्फ अज्ञात हतियार प्रक्षेपण गरेको छ, जसलाई जापान र दक्षिण कोरियाले पुष्टि गरेका छन्। जापानले उक्त हतियार ब्यालिस्टिक क्षेप्यास्त्र हुन सक्ने आशंका व्यक्त गरेको छ।
दक्षिण कोरियाली सेनाको संयुक्त चिफ्स अफ स्टाफले प्रक्षेपणको जानकारी दिए पनि विस्तृत विवरण सार्वजनिक गरेको छैन। जापानकी प्रधानमन्त्री साने ताकाइचीको कार्यालयले पनि प्रक्षेपणको पुष्टि गरेको छ।
यो प्रक्षेपण अक्टोबर ८ मा दक्षिण कोरियाले आफ्नै प्रविधिमा विकसित गरेको हाइपरसोनिक हतियारको पहिलो उडान परीक्षण गरेको केही दिनपछि भएको हो। दक्षिण कोरियाका राष्ट्रपति ली जे म्युङले यसलाई देशको रक्षा क्षमता बलियो बनाउने महत्त्वपूर्ण कदम बताएका थिए।
यसअघि अक्टोबर ३ मा उत्तर कोरियाले वोनसान क्षेत्रबाट ब्यालिस्टिक क्षेप्यास्त्र प्रक्षेपण गरेको थियो। उत्तर कोरियाको सरकारी सञ्चारमाध्यमका अनुसार, नेता किम जोङ उनको निगरानीमा गरिएको उक्त परीक्षण मध्यम दूरीको क्षेप्यास्त्रमार्फत ‘हाइपरसोनिक रणनीतिक हतियार प्रणाली’ सञ्चालन गर्ने उद्देश्यले गरिएको थियो।
उत्तर कोरियाले आणविक क्षमतायुक्त हतियारको भण्डार विस्तार गर्ने उद्देश्यले पछिल्लो समय क्षेप्यास्त्र परीक्षण र सैन्य अभ्यास तीव्र बनाएको छ। उसले नयाँ युद्धपोत पनि सञ्चालनमा ल्याएको छ। नेता किम जोङ उनले आणविक हतियार कार्यक्रम अघि बढाइरहेका छन् भने अमेरिका र दक्षिण कोरियाले संवाद पुनः सुरु गर्न गरेका प्रस्ताव अस्वीकार गर्दै आएका छन्।
गत सेप्टेम्बर २१ मा दुई कोरियाबिचको भारी हतियार तैनाथ गरिएको सीमाक्षेत्र नजिकै भएका विस्फोटमा दक्षिण कोरियाका तीन सैनिक घाइते भएका थिए। दक्षिण कोरियाली सेना र अमेरिकी नेतृत्वको संयुक्त राष्ट्रसंघीय कमान्डले उक्त विस्फोट उत्तर कोरियाले राखेका उपकरणका कारण भएको निष्कर्ष निकालेका थिए। यद्यपि, उत्तर कोरियाले उक्त विस्फोटको जिम्मेवारी अस्वीकार गरेको थियो।
उत्तर कोरियाले सन् २०२६ मा १० भन्दा बढी मिसाइल परीक्षण गरिसकेको छ। सोमबार प्रक्षेपण गरिएको हतियारको विस्तृत विवरण भने अझै सार्वजनिक गरिएको छैन।
