सशस्त्र प्रहरी बल, नेपालले दशैँ, तिहार र छठलगायत चाडपर्वलाई लक्षित गर्दै ‘चाडपर्व लक्षित विशेष सुरक्षा योजना, २०८३’ लागू गरेको छ। यस योजनाअन्तर्गत देशभर २८ हजार १ सय २६ सशस्त्र प्रहरी परिचालन गरिएको छ।
सशस्त्र प्रहरी नायव महानिरीक्षक नेत्र बहादुर कार्कीका अनुसार, थप ४ हजार ५ सय जनशक्ति तयारी अवस्थामा राखिएको छ। यो योजना असोज २२ गतेदेखि लागू भएको हो।
योजनाले सीमा सुरक्षा, नागरिक तथा सार्वजनिक सम्पत्तिको सुरक्षा, विपद् व्यवस्थापन र आपत्कालीन उद्धारलाई प्राथमिकता दिएको छ। सीमा क्षेत्रमा सुरक्षा निगरानी बढाउन १४१ स्थानमा नागरिक सहायता कक्ष, १६ स्थानमा स्वास्थ्य कक्ष र १३ स्थानमा पर्यटक सहायता कक्ष स्थापना गरिएको छ।
काँकडभिट्टा, वीरगञ्ज, बेलहिया र जमुनाह नाकामा अवैध हातहतियार, विस्फोटक पदार्थ तथा लागूऔषध पहिचानका लागि तालिमप्राप्त टोली परिचालन गरिएको छ। चाडपर्वको अवधिभर ९२४ वटा संयुक्त सीमा गस्ती सञ्चालन गर्ने योजना रहेको छ।
संवेदनशील स्थानमा २१ वटा ड्रोन परिचालन गरिनेछ भने सीमा नाकाका महत्वपूर्ण स्थानमा जडान गरिएका ४१२ सीसीटिभी क्यामेराबाट २४सैँ घण्टा निगरानी गरिनेछ। विपद् वा आपत्कालीन अवस्थामा नागरिकले सशस्त्र प्रहरीको टोल फ्री नम्बर १११४ तथा सीमा हटलाइन ९८५१२६०७३० मा सम्पर्क गर्न सक्नेछन्।
यसअघि नेपाल प्रहरीले पनि चाडपर्व लक्षित सुरक्षा योजना लागू गर्दै देशभर ५० हजारभन्दा बढी प्रहरी परिचालन गरेको थियो। नेपाल प्रहरीको सुरक्षा योजनाबारे थप विवरण यहाँ पढ्नुहोस्।
यस योजनाअन्तर्गत पर्सा प्रहरीले पनि जिल्लाका संवेदनशील तथा भीडभाड हुने स्थानमा प्रहरी जनशक्ति परिचालन गरी नियमित गस्ती, निगरानी र चेकजाँच बढाएको छ। वीरगञ्जका विभिन्न मन्दिर र छठ घाटहरूमा विशेष सुरक्षा व्यवस्था मिलाइने पर्सा प्रहरीले जनाएको छ।
यसअघि: चाडपर्वका लागि ५० हजार प्रहरी परिचालन, सवारीमा मेकानिकल टेस्ट रिपोर्ट अनिवार्य
