नेपाली सेनाले सैनिक कल्याणकारी कोषको ९७ अर्ब रुपैयाँ जलविद्युत र सौर्य ऊर्जामा लगानी गर्ने भएको छ। प्रधानसेनापति अशोकराज सिग्देलले पहिलो चरणमा कोषको रकम राष्ट्रिय विकासमा योगदान पुग्ने गरी यस क्षेत्रमा परिचालन गर्ने जानकारी दिए।
रक्षा मन्त्रालयमा आयोजित समीक्षा बैठकमा सिग्देलले कल्याणकारी कोषलाई राष्ट्रिय विकासमा उपयोग गर्ने विकल्प खोजी भइरहेको बताए। ‘पहिलो चरणमा जलविद्युत् र सौर्य ऊर्जामार्फत विद्युत् उत्पादन गर्ने कामलाई परीक्षणका रूपमा अघि बढाउने सोचमा छौँ,’ उनले भने, ‘यो सफल भए कोषको रकम विकास निर्माणमा लगानी गर्नेछौँ ।’
सिग्देलका अनुसार कोषको कुल सम्पत्ति ९७ अर्ब छ। यसमध्ये ९१ अर्ब नगद मौज्दात र ६ अर्ब लगानी छ। कोषको आम्दानीको ९० प्रतिशतसम्म खर्च गर्न पाउने व्यवस्था छ। बैंकको ब्याजदर घटेकाले कल्याणकारी कार्यक्रमको खर्च व्यवस्थापनमा चुनौती थपिएको उनले बताए।
हाल कोषबाट स्वास्थ्य सेवातर्फ १० लाख हिताधिकारी र शिक्षातर्फ ११ हजार विद्यार्थी लाभान्वित छन्। स्वास्थ्य सेवाका लाभग्राहीमा सैनिक परिवार तथा भूतपूर्व सैनिक छन्। शिक्षातर्फ कक्षा १२ सम्मका साथै एमबिबिएस, इन्जिनियरिङलगायत प्राविधिक शिक्षाका विद्यार्थी लाभान्वित भइरहेका छन्। कल्याणकारी कोषको खर्च सैनिक तथा भूतपूर्व सैनिकको हितमा केन्द्रित छ।
सेनाको व्यवस्थापनमा निर्माणाधीन काठमाडौँ–तराई÷मधेस द्रुतमार्गमा देखिएका समस्या समाधानका लागि प्रयास भइरहेको छ। आगामी वर्ष आयोजनाको प्रगति उच्च हुने विश्वास सिग्देलले व्यक्त गरे। काममा ढिलाइ गर्ने निर्माण व्यवसायीलाई सुधारको अवसर दिइनेछ। प्रगति नभए ठेक्का सम्झौता अन्त्य गरिनेछ।
द्रुतमार्गको सुरु बिन्दु खोकना क्षेत्रको जग्गा अधिग्रहण र मुआब्जा वितरणमा ढिलाइले आयोजना प्रभावित भएको छ। जग्गा प्राप्ति, रुख कटान, मुआब्जा वितरण, निर्माण व्यवसायीको डिजाइन तथा उपकरण व्यवस्थापनमा ढिलाइले प्रगति रोखिएको छ।
गत आर्थिक वर्षमा द्रुतमार्गको लक्ष्यको तुलनामा भौतिक प्रगति ६३.७० प्रतिशत र वित्तीय प्रगति ७१.८२ प्रतिशत थियो। आयोजनाको हालसम्मको कुल भौतिक प्रगति ४८.७२ प्रतिशत र वित्तीय प्रगति ५०.६२ प्रतिशत पुगेको छ।
