बर्दिया राष्ट्रिय निकुञ्जले गेरुवा गाउँपालिका–४ मा बस्ती पसेर स्थानीयलाई त्रसित पार्ने वयस्क पाटे बाघ नियन्त्रणमा लिएको छ। सोमबार बिहान निकुञ्जको टोलीले अन्दाजी ७ वर्षको भाले बाघ नियन्त्रणमा लिएको हो।
केही समयदेखि बस्तीमा पसेर घरपालुवा पशुचौपायालाई आक्रमण गरिरहेको बाघका कारण स्थानीय बासिन्दा त्रसित बनेका थिए। राष्ट्रिय प्रकृति संरक्षण कोषका प्रमुख अजित तुम्वाहाम्फेले बाघको उमेर अन्दाजी ७ वर्ष रहेको बताए।
बर्दिया राष्ट्रिय निकुञ्जका प्रमुख संरक्षण अधिकृत डा. अशोक कुमार रामले पशुचौपायालाई थप क्षति हुन नदिन बाघलाई नियन्त्रणमा लिइएको बताए। नियन्त्रणमा लिइएको बाघलाई रम्मापुर सेक्टरमा राखिएको छ।
यसअघि भदौ २ गते पनि सोही गाउँपालिकाबाट एक समस्याग्रस्त पाटे बाघ नियन्त्रणमा लिइएको थियो। निकुञ्जका अनुसार हालसम्म ७ वटा समस्याग्रस्त पाटे बाघ नियन्त्रणमा लिई उद्धार केन्द्रमा राखिएको छ।
समस्याग्रस्त बाघ नियन्त्रणका लागि बर्दिया राष्ट्रिय निकुञ्ज, राष्ट्रिय प्रकृति संरक्षण कोष र नेपाली सेनाको संयुक्त टोली खटिएको थियो।
