बर्दियामा गत साउनयता जेठ २६ गतेसम्म ११ जनाको बन्यजन्तु आक्रमणबाट ज्यान गएको छ। डिभिजन वन कार्यालय बर्दियाका अनुसार चितुवाबाट ८, पाटे बाघबाट २ र हात्तीबाट १ जनाको मृत्यु भएको छ।
यस्तै, १५ जना घाइते भएका छन्। चितुवाको आक्रमणबाट १३ र गैंडाको आक्रमणबाट २ जना घाइते भएको कार्यालयले जनाएको छ।
गत आर्थिक वर्ष ०८१/०८२ मा ४ जना चितुवा, एक गैंडा र एक जना हात्तीको आक्रमणमा परी मृत्यु भएको थियो।
समस्याग्रस्त ६ वटा चितुवा नियन्त्रणमा लिए पनि त्रास कम भएको छैन। गुलरिया, राजापुर, मधुवन, बारबर्दिया लगायतका पालिकामा चितुवा बेलाबेलामा गाउँ पस्ने गरेको छ।
बर्दियासँग जोडिएको भारतीय सीमाना कतरनियाघाट वन्यजन्तु आरक्ष र बर्दिया निकुञ्जमा बाघको संख्या बढ्दै जाँदा चितुवा सामुदायिक वन हुँदै गाउँबस्तीमा पस्ने गरेको राष्ट्रिय प्रकृति संरक्षण कोष, बर्दियाका प्रमुख अजित तुम्फाहाम्फेले बताए।
उनका अनुसार निकुञ्जमा बाघको डरले चितुवा मध्यवर्ती क्षेत्र हुँदै बस्तीमा पस्ने र स्थानीय वस्तुभाउ खाएपछि मानिसमाथि आक्रमण गर्ने गरेको छ।
बर्दिया निकुञ्जले दिएको जानकारी अनुसार पछिल्लो गणनामा निकुञ्जमा १ सय २५ वटा बाघ रहेका छन्। चितुवाको गणना नभएकाले यकिन संख्या थाहा हुन सकेको छैन।
