झापाको भद्रपुर-राजगढ हुलाकी राजमार्ग एक वर्षमै भत्किएपछि यात्रुको दैनिक यात्रा जोखिमपूर्ण बनेको छ।
सडकमा ठूला खाल्डाखुल्डी छन्, पुल र कल्भर्ट पनि अधुरै छन्। यसले दुर्घटनाको जोखिम बढाएको स्थानीय बताउँछन्। हल्दीबारी गाउँपालिकाको वडा नम्बर ३, ४ र ५ मा पर्ने भुतेनी र भुसुडी खोलामा निर्माण अधुरो छ।
स्थानीय नेत्रविक्रम बिमलीले सडक भत्किएको र पुल, कल्भर्ट पूर्ण नबनेकाले दैनिक यात्रा जोखिमपूर्ण बनेको बताए। खाल्डाखुल्डीका कारण साना तथा ठूला सवारीसाधन दुर्घटनामा पर्ने क्रम बढेको स्थानीयवासीको भनाइ छ।
वर्षायाम नजिकिँदै गर्दा सडकको अवस्था अझ भयावह बन्ने स्थानीयको चिन्ता छ। हल्दीबारी गाउँपालिकाका प्रमुख प्रशासकीय अधिकृत मानबहादुर वनले सडकको दयनीय अवस्थाबारे पटकपटक ध्यानाकर्षण गराए पनि सुधार नभएको बताए।
हल्दीबारी–४ का वडाध्यक्ष सन्तकुमार थापाले छोटो समयमै सडक भत्किनुले निर्माणको गुणस्तरमाथि प्रश्न उठाए। समयमै मर्मत नभए थप क्षति हुनेतर्फ उनले सरोकारवाला निकायलाई सचेत गराए।
हल्दीबारीका स्थानीय प्रल्हाद सेलवालले हिउँदमा समेत अधुरा पुल र कल्भर्टका कारण यात्रामा समस्या भएको बताए। “सडक बनेपछि सहज यात्राको अपेक्षा थियो,” उनले भने, “तर अहिले झन् जोखिमपूर्ण अवस्थामा आवतजावत गर्नुपर्ने बाध्यता छ।”
हुलाकी राजमार्ग निर्देशनालय, आयोजना कार्यालय इटहरीका इन्जिनियर उपेन्द्र दासले झापाचोकदेखि राजगढपारिसम्मको १९.५० किलोमिटर सडकखण्ड हस्तान्तरण नभएको बताए।
उनका अनुसार, सडक निर्माणको ठेक्का आशिष याक्थुङहाङ जेभीले लिएको छ। निर्माण कम्पनी ‘त्रुटि सच्याउने अवधि’मा रहेकाले भत्किएका संरचनाको मर्मत सोही कम्पनीले गर्नुपर्नेछ।
