भोजपुर नगरपालिका–४ डाँडागाउँका १५ घरपरिवारले वर्षौंपछि खानेपानीको समस्याबाट मुक्ति पाएका छन्। ‘ओखिम खानेपानी आयोजना’ले घरघरमा धारा पुर्याएपछि उनीहरूलाई बाह्रै महिना पानीको सुविधा उपलब्ध भएको छ।
टिकादेवी खड्काको घरमा धारा आएपछि दैनिक जीवन सहज बनेको छ। “घरमै पानी आएपछि सरसफाइ, चौपायालाई खुवाउन सजिलो भयो,” उनले भनिन्। विगतमा खोलाको पानी बोकेर ल्याउनुपर्ने बाध्यता थियो। ज्ञाद्रमाया पाण्डेले पानी ल्याउन लाग्ने समय र श्रम बचत भएको बताइन्। “घरमै धारा जडान भएसँगै बालबच्चा र घरयासी काममा सहजता आएको छ,” उनले भनिन्।
निर्माण उपभोक्ता समिति अध्यक्ष ज्ञानबहादुर बस्नेतले आर्थिक वर्ष २०८१/८२ मा सुरु भएको आयोजना २०८२/८३ मा सम्पन्न भएको जानकारी दिए। पानीको समस्यामा रहेका परिवारमा ‘एक घर, एक धारा’ जडान गरिएको छ। स्थानीय उपभोक्ताबाट सङ्कलन गरिएको रु तीन लाखमा मुहान खरिद गरी बस्तीसम्म पानी ल्याइएको हो।
खानेपानी तथा सरसफाइ डिभिजन कार्यालय भोजपुरका प्रमुख आशुतोषकुमार ठाकुरले जनश्रमदान र कार्यालयको २५ लाख लगानीमा आयोजना सम्पन्न भएको बताए। इन्जिनियर दीपक यादवका अनुसार मुख्य पाइपलाइन एक हजार मिटर र वितरण पाइपलाइन दुई हजार एक सय मिटर छ। आयोजनाले डाँडागाउँ टोलका १५ घरपरिवारलाई नियमित खानेपानी उपलब्ध गराएको छ।
