भोजपुरको टेम्केमैयुङ गाउँपालिका–५ खावामा १७० भन्दा बढी किसानले व्यावसायिक किवी खेतीबाट दीर्घकालीन आम्दानी सुनिश्चित गरेका छन्। दीर्घकालीन आम्दानीको सम्भावनाले वडा कार्यालयलाई किवी खेती प्राथमिकतामा राख्न र किसानलाई प्रोत्साहन गर्न प्रेरित गरेको छ।
वडाध्यक्ष सुनिल राईका अनुसार १७० किसानलाई किवीका बिरुवा वितरण गरिएको छ। किवी खेतीका लागि उपयुक्त भूगोल र हावापानी भएका क्षेत्र लक्षित छन्। अहिलेसम्म दुई हजार ५०० भन्दा बढी बिरुवा वितरण भइसकेका छन्।
वडाध्यक्ष राईले भने, “हाम्रो वडामा किवी खेतीको राम्रो सम्भावना छ। किसानको रुचि पनि यसतर्फ बढ्दो छ। किवीका माध्यमबाट किसानलाई आयआर्जनमा जोड्ने लक्ष्यसहित खेती विस्तारमा जोड दिएका छौँ।”
वडा कार्यालयले किसानलाई व्यावसायिक कृषि उत्पादनतर्फ आकर्षित गर्न बिरुवा र प्राविधिक सहयोग उपलब्ध गराउँछ। किवी खेतीका लागि यहाँको हावापानी अनुकूल छ। यसले किसानलाई व्यावसायिक खेती विस्तारमा प्रोत्साहन गरेको छ।
वडाको सहयोग पाएपछि अधिकांश किसान व्यावसायिक किवी खेतीतर्फ आकर्षित भएको स्थानीय भीमसेन राई बताउँछन्। उनले भने, “एकपटक विस्तार गरेपछि सामान्य हेरचाहमै वर्षौँसम्म आम्दानी लिन सकिने भएकाले किसान यसतर्फ आकर्षित भएका हौँ।”
भीमसेन राईले आफ्नै १० रोपनी जमिनमा करिब १५० बोट किवी खेती विस्तार गरेको जानकारी दिए। राम्रो फलेको एक बोटबाट नौ हजार रुपैयाँसम्म आम्दानी लिएको उनको भनाइ छ।
अर्का किसान तेजन विष्टले वडाबाट बिरुवा र प्राविधिक सहयोग पाएपछि किवी खेतीमा उत्साह थपिएको बताए। परम्परागत बालीभन्दा किवीबाट राम्रो आम्दानी हुने भएकाले आफूहरू यसतर्फ लागेको उनको भनाइ छ। उनले हाल ५० बोट खेती विस्तार गरेका छन्।
मझौले, खावा, रमिते लगायतका क्षेत्रमा किवी खेती विस्तार भइरहेको छ। १७० किसानले २५०० भन्दा बढी बिरुवा लगाएका छन्।
