भोटेकोशी नदीमा आएको विनाशकारी बाढीले रसुवा र नुवाकोट जिल्लाका करिब ६०० विद्यार्थी अझै सम्पर्कविहीन अवस्थामा रहेका छन्। बाढीका कारण नौ दिनदेखि दुवै जिल्लाका दर्जनौं विद्यालय बन्द छन्।
जिल्ला शिक्षा विकास तथा समन्वय इकाइ र स्थानीय तहको प्रारम्भिक तथ्यांकअनुसार रसुवामा करिब २८० र नुवाकोटमा ३०० देखि ३५० विद्यार्थी सम्पर्कविहीन रहेको अनुमान छ। नुवाकोट शिक्षा विकास तथा समन्वय इकाइका प्रमुख सूर्यबहादुर खत्रीले प्रधानाध्यापकहरूसँग सम्पर्क गरी हराएका विद्यार्थीको विवरण संकलन गरिरहेको बताए। केही सम्पर्कविहीन भनिएका विद्यार्थी भेटिएका छन् भने केही विद्यालयबाट थप विवरण आइरहेको छ।
रसुवा इकाइका प्रमुख दुर्गाप्रसाद सिलवालले जिल्लामा करिब २८० विद्यार्थी सम्पर्कविहीन रहेको जानकारी दिए। यकिन विवरण संकलन कार्य जारी छ। नुवाकोटको विदुर नगरपालिकामा मात्रै करिब २५० विद्यार्थी सम्पर्कविहीन रहेको शिक्षा शाखाका विद्यालय निरीक्षक नवराज सापकोटाले बताए।
यसैगरी, बाढीले रसुवा र नुवाकोटमा २२ शिक्षक तथा विद्यालय कर्मचारीसमेत बेपत्ता बनाएको छ। रसुवामा १६ र नुवाकोटमा ६ जना शिक्षक सम्पर्कविहीन रहेको सम्बन्धित इकाइले जनाएको छ। सम्पर्कविहीन भएका केही विद्यार्थी र शिक्षकका शव विभिन्न जिल्लामा फेला परे पनि आधिकारिक पुष्टि हुन बाँकी छ।
नुवाकोटको विदुर नगरपालिका–१० स्थित उत्तरगया पब्लिक स्कुल बाढीले पूर्ण रूपमा बगाएको छ। विद्यालयका सञ्चालक तथा प्रधानाध्यापक सोमलाल लावतका अनुसार विद्यालयमा ३६२ विद्यार्थी अध्ययनरत थिए। बाढीले विद्यालय बगाएपछि कति विद्यार्थी प्रभावित भए भन्ने यकिन हुन सकेको छैन। रसुवाको उत्तरगया गाउँपालिका–५ स्थित नीलकण्ठ माध्यमिक विद्यालयमा ४९६ विद्यार्थी अध्ययनरत थिए। विद्यालयले २०० विद्यार्थी र चार शिक्षक सम्पर्कमा नरहेको जनाएको छ। प्रधानाध्यापक माधव लामिछानेले अभिभावक बेपत्ता भएकाले विद्यार्थीको विवरण संकलनमा कठिनाई भएको बताए।
भदौ १० गतेको बाढीपछि नुवाकोटको विदुर नगरपालिका र रसुवाका चार गाउँपालिकाका विद्यालय नौ दिनदेखि बन्द छन्। रसुवाको नौकुण्ड गाउँपालिकाका २९ सामुदायिक विद्यालय भने सञ्चालनमा आएका छन्। गोसाईंकुण्ड, उत्तरगया, कालिका र आमाछोदिङ्मो गाउँपालिकाका विद्यालय बन्द छन्। आमाछोदिङ्मो गाउँपालिकाबाट मात्रै ५८ अभिभावक सम्पर्कविहीन छन्।
शिक्षा मन्त्रालयका अनुसार धादिङसहित तीन जिल्लाका २२ विद्यालय बाढीबाट क्षतिग्रस्त वा प्रभावित भएका छन्, जसमध्ये १२ विद्यालय पूर्ण रूपमा ध्वस्त भएका छन्। मन्त्रालयले क्षतिको मूल्यांकन गर्न प्राविधिक टोली पठाएको छ। टोलीले सात दिनभित्र प्रतिवेदन बुझाएपछि शैक्षिक गतिविधि सञ्चालनको योजना बनाइनेछ।
