काठमाडौँ । नक्कली भुटानी शरणार्थी प्रकरणको मुद्दामा काठमाडौँ जिल्ला अदालतमा एक सातादेखि सुनुवाइ चलिरहेको छ।
गत जेठ २७ गतेदेखि सुरु भएको सुनुवाइ बिहीबार न्यायाधीश तेजबहादुर खड्काको इजलासले बहस नसकिएपछि हेर्दाहेर्दैमा राखेको छ।
नेपाली नागरिकलाई नक्कली भुटानी शरणार्थी बनाई अमेरिकालगायतका देशमा पठाउने भन्दै ठूलो रकम असुली गरिएको यो प्रकरण लामो समयदेखि अवरुद्ध थियो।
२०८० जेठ १० मा काठमाडौं जिल्ला अदालतमा मुद्दा दायर भयो। पूर्व उपप्रधानमन्त्री टोपबहादुर रायमाझी (एमाले) र पूर्व गृहमन्त्री बालकृष्ण खाँण (कांग्रेस) यस प्रकरणका प्रमुख आरोपित हुन्। तत्कालीन गृह सचिव टेकनारायण पाण्डे, पूर्वसांसद आङटावा शेर्पा र तत्कालीन गृहमन्त्री रामबहादुर थापाका सुरक्षा सल्लाहकार इन्द्रजित राई पनि आरोपित छन्। उनीहरूसहित ३० जनामाथि किर्ते, ठगी, सङ्गठित अपराध र राज्यविरुद्धको अपराधको अभियोग छ।
अभियोगपत्रले सङ्गठित गिरोहले कागजात तयार पारी नेपाली नागरिकलाई भुटानी शरणार्थी बनाएको दाबी गर्छ।
मुख्य बिचौलिया केशव दुलाल, उनकी पत्नी दीपा हुमागाईं, सानु भण्डारी र सन्देश शर्मामाथि पनि मुद्दा दायर भएको छ। गिरोहको सञ्जालमा काम गर्ने टंककुमार गुरुङ, मोहनराज राई, निरञ्जनकुमार खरेल, केशव तुलाधर, हरिभक्त महर्जन र उनकी पत्नी लक्ष्मी महर्जन पनि आरोपित छन्। राजेश अर्याल, विनिता सावदेन लिम्बु, सागर राई, आशिष बुढाथोकी, सुनिल बुढाथोकी, रामशरण केसी, अशोक पोखरेल, गोविन्दकुमार चौधरी, धिरेन राई, बेचन झा र भुटानी शरणार्थी नेता टेकनाथ रिजालविरुद्ध सोही कसुरमा मुद्दा दायर भएको थियो।
