विराटनगर विमानस्थल केन्द्रमा साउन १८ गते बिहान ८:४५ देखि साउन १९ गते बिहान ८:४५ बजेसम्म १५१.६ मिलिमिटर वर्षा मापन भएको छ। यो अवधिमा देशभरका ४३७ वर्षा मापन केन्द्रमध्ये ३६५ केन्द्रमा वर्षा रेकर्ड भएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।
सोही अवधिमा देशभरका ८७ केन्द्रबाट तापक्रमको विवरण पनि सङ्कलन गरिएको थियो। प्राधिकरणका अनुसार रुपन्देहीको तौलिहवामा न्यूनतम तापक्रम २९.१ डिग्री सेल्सियस थियो। सिराहाको लहानमा अधिकतम तापक्रम ३७.२ डिग्री सेल्सियस मापन गरिएको छ।
सबैभन्दा कम न्यूनतम तापक्रम मुस्ताङको थाकमार्फामा ९.५ डिग्री सेल्सियस थियो। सोलुखुम्बुको लुक्लामा सबैभन्दा कम अधिकतम तापक्रम १६.१ डिग्री सेल्सियस रेकर्ड भएको छ।
