वीरगन्जका मेयर राजेशमान सिंह लिखत कसुरमा पक्राउ परेका छन्। जिल्ला अदालत पर्साले पक्राउ पुर्जी जारी गरेको आठ दिनपछि प्रहरीले उनलाई ठोरीबाट नियन्त्रणमा लिएको हो।
जिल्ला प्रहरी कार्यालय पर्साका प्रहरी प्रमुख सुदिपराज पाठकका अनुसार विशेष सूचनाको आधारमा ठोरी एरियामा लुकीछिपी बसेका बेला मेयर सिंहलाई पक्राउ गरिएको हो। पक्राउ पुर्जी जारी भएपछि उनी अदालतमा हाजिर भएर फरार भएका थिए।
स्थानीय लियाकत अलीको जाहेरीका आधारमा जिल्ला अदालत पर्साले मेयर सिंहसहित तीन जनाविरुद्ध पक्राउ पुर्जी जारी गरेको थियो। पक्राउ परेका सिंहलाई जिल्ला प्रहरी कार्यालय पर्साको हिरासतमा राखी थप अनुसन्धान भइरहेको प्रहरीले जनाएको छ।
