वीरगञ्ज महानगरपालिकाका मेयर राजेशमान सिंह सरकारी कागजात किर्ते जालसाजीको अभियोगमा पक्राउ पुर्जी जारी भएपछि पर्सा जिल्ला अदालतमा उपस्थित भएर एकाएक ‘लुप्त’ भएका छन्। अदालत खुल्नुअघि नै दलबलसहित पुगेका सिंहले उन्मुक्ति प्रयास गरे पनि प्रक्रिया सुरु हुनुअघि नै उनी परिसरबाट बेपत्ता भएका हुन्।
मेयर सिंह, उनकी कथित कान्छी श्रीमती रिता भट्टराई र तत्कालीन वडा पञ्जिकाधिकारी भिखारी रायविरुद्ध नागरिकता लिखतसम्बन्धी कसुरमा पक्राउ पुर्जी जारी भएको थियो। सामाजिक सञ्जालमा भिडियो सार्वजनिक भएपछि प्रहरीले उनलाई नियन्त्रणमा लिन अदालत पठाए पनि प्रहरी पुग्नुअघि नै सिंह परिसरबाट बाहिरिसकेका थिए।
मुद्दाका उजुरीकर्ता लियाकत अलीका अनुसार मेयर सिंह अदालतका श्रेस्तेदार प्रभाकर मल्लिकको कोठामा बसेर छलफल गरी निस्किएका थिए। श्रेस्तेदार मल्लिकले भने अदालत खुल्नुअघि को आउँछ, को जान्छ भन्ने विषयमा अदालत जिम्मेवार नहुने बताएका छन्।
नेपाल बार एसोसिएसनका पदाधिकारीहरूले घटनाक्रमले कानुनी राज्यको धज्जी उडाएको भन्दै चिन्ता व्यक्त गरेका छन्। सरकारी वकिल कार्यालयले मुद्दामा मेयर सिंह र भट्टराईको नाम लुकाउन खोजेको आरोप पनि लागेको छ।
यता मेयर सिंहका स्वकीय सचिवले भने अदालतमा मुद्दाको चापले सुनुवाइ नहुने जानकारी पाएपछि समन्वयमा फर्केको दाबी गरेका छन्। तर, अदालतले पक्राउ पुर्जी जारी गरेको व्यक्तिलाई कर्मचारीको समन्वयमा विदापछि हाजिर हुने सल्लाह दिनुले अदालतका कर्मचारीमाथि गम्भीर प्रश्नचिन्ह खडा भएको छ।
