बिर्तामोड नगरपालिका-५ मा डेरा गरी बस्ने २२ वर्षीया रविना मगरको कोठामा असोज १२ गते राति मादक पदार्थ सेवन गरी प्रवेश गरेका ४२ वर्षीय दिलीपचन्द्र रायले युवतीको हातखुट्टा र घाँटी बाँधी शरीरमा पेट्रोल छर्केर आगो लगाउन खोजेका हुन्।
भारतको किशनगञ्ज जिल्ला घर भई बिर्तामोडस्थित अमृत भोग मिठाई पसलमा काम गर्ने रायले तन्ना च्यातेर मगरको हातखुट्टा एवं घाँटी बाँधेका थिए। त्यसपछि शरीरमा पेट्रोल छर्केर ज्यान लिने प्रयास गरेका थिए।
घटनाबारे जानकारी पाउनासाथ खटिएको प्रहरी टोलीले रायलाई नियन्त्रणमा लिएको छ। घाइते मगरको मनमोहन अस्पताल बिर्तामोडमा उपचार भइरहेको छ। पक्राउ परेका रायमाथि प्रहरीले थप अनुसन्धान अघि बढाएको छ।
