कम्बोडियामा ६६ नेपाली नागरिक सम्पर्कविहीन भएका छन्। बैंककस्थित नेपाली राजदूतावासले उनीहरूलाई १२ जुन २०२६ भित्र नेपाल फर्किन अनुरोध गरेको छ।
विभिन्न उद्देश्यले कम्बोडिया पुगेका ६०२ नेपालीले भिसा अवधि सकिएपछि पनि नवीकरण नगरी बसेका थिए। कम्बोडिया सरकारले उनीहरूको भिसा शुल्क र जरिवाना मिनाहा गरी स्वदेश फर्कन सहजीकरण गरेको थियो।
तर, ६६ नेपालीले भने नेपाल फर्किन कुनै तदारूकता नदेखाएको दूतावासले जनाएको छ।
तोकिएको समयमा स्वदेश नफर्कने विदेशी नागरिकमाथि कम्बोडिया सरकारले नयाँ कानुनअनुसार कारबाही गर्नेछ। यसअन्तर्गत पाँच लाख अमेरिकी डलरसम्म जरिवाना वा आजीवन कारावाससम्मको सजाय हुन सक्नेछ।
कानुनी आधार बिना कम्बोडियामा लुकिछिपी बस्ने नेपाली नागरिक पक्राउ परी कठोर कानुनी सजाय भोग्नुपर्ने अवस्था आउन सक्ने भन्दै दूतावासले सचेत गराएको छ।
