केन्द्रीय बैंकले वित्तीय प्रणालीमा रहेको अधिक तरलता व्यवस्थापन गर्न ४५ अर्ब रुपैयाँ खिच्ने भएको छ। केन्द्रीय बैंकले स्थायी निक्षेप सुविधा र निक्षेप संकलन उपकरणमार्फत यो रकम तानेको हो।
वित्तीय प्रणालीमा बिहीबारसम्म करिब ६१ अर्ब रुपैयाँ तरलता छ। बैंक तथा वित्तीय संस्थाको थप रकम परिपक्व हुने भएपछि त्यसलाई पुनः तरलतामा ल्याउन केन्द्रीय बैंकले निक्षेप संकलन उपकरण जारी गरेको हो। यसअघि जेठ २९ गते १९ दिने अवधिको एक खर्ब रुपैयाँ बराबरको निक्षेप संकलन उपकरण जारी गरिएको थियो।
केन्द्रीय बैंकले वित्तीय प्रणालीको तरलता र ब्याजदर व्यवस्थापनका लागि यस्ता उपकरणहरूको प्रयोग गर्छ। प्रणालीमा तरलता अधिक हुँदा बैंक तथा वित्तीय संस्थाहरू अल्पकालीन अवधिका लागि स्थायी निक्षेप सुविधा मार्फत केन्द्रीय बैंकमा रकम जम्मा गर्छन्।
निक्षेप संकलन उपकरणमा केन्द्रीय बैंकले थोरै ब्याजदर माग गर्ने बैंक तथा वित्तीय संस्थालाई प्राथमिकतामा राखेर बाँडफाँट गर्छ। तरलता खिच्दा केन्द्रीय बैंकले स्थायी निक्षेप सुविधा दर बराबरको ब्याज दिन्छ, जुन हाल २.७५ प्रतिशत छ। तरलता पठाउँदा भने बैंकदर (हाल ६ प्रतिशत) मा ब्याज लिने व्यवस्था छ।
