संसदीय सुनुवाइ समितिले प्रमुख निर्वाचन आयुक्तमा प्रस्तावित मानबहादुर कार्कीको सुनुवाइ आज गर्दैछ। समितिको बैठक बिहान ११:१५ बजे बस्नेछ। संवैधानिक परिषद्ले गत असार १९ गते कार्कीलाई प्रमुख आयुक्तमा सिफारिस गरेको थियो। परिषद्ले निर्वाचन आयुक्तमा गुरुप्रसाद वाग्ले र डा. राजीव सुब्बाको नाम पनि सिफारिस गरेको थियो।
समितिले मंगलबार प्रस्तावित आयुक्त वाग्ले र डा. सुब्बाको सुनुवाइ सम्पन्न गरिसकेको छ। सुनुवाइका क्रममा वाग्लेले नेपाली नागरिकता नत्यागेका र विदेशी स्थायी बसोवास नलिएकालाई मताधिकार दिन सकिने बताए। डा. सुब्बाले निर्वाचन आयोगलाई प्रविधिको सहयोगमा सञ्जीवनी संस्थाका रुपमा स्थापित गर्नुपर्नेमा जोड दिए।
सांसदहरूले निर्वाचन प्रणालीलाई पारदर्शी, व्यवस्थित, विश्वसनीय, मितव्ययी र निष्पक्ष बनाउन आग्रह गरे। विदेशमा रहेका मतदाताको मतदान सुनिश्चित गर्ने विषयमा ठोस कार्ययोजना माग गरे। प्रस्तावित आयुक्तहरूले कानुन सुधार, पूर्वाधार तयारी, सरोकारवाला परामर्श, विदेशमा रहेका नेपालीको मतदान, अन्तरजिल्ला मतदान, विद्युतीय मतदान मेसिन प्रयोग र इभोटिङबारे कार्ययोजना प्रस्तुत गरे।
