चोचेन (भोटेकोशी) नदी आसपासका हिमनदीहरूमा थप पहिरोको जोखिम रहेको चीनको जलस्रोत मन्त्रालयले बताएको छ। यसले ठूलो खतरा निम्त्याउन सक्ने मन्त्रालयको ठहर छ।
चिनियाँ सरकारी सञ्चार माध्यम सिसीटीभी न्यूजले मंगलबार मन्त्रालयलाई उद्धृत गर्दै सो रिपोर्ट प्रकाशित गरेको हो। मन्त्रालयले चीनको दक्षिणपश्चिम तिब्बत स्वायत्त क्षेत्रको ग्यारोङ (केरुङ) काउन्टीमा आएको लेदो र बाढी प्रकोपसँग सम्बन्धित जोखिमको निरन्तर अनुगमन गरिरहेको छ।
ग्यारोङ जाङबो नदी बेसिनमा यसअघि पहिचान गरिएका १४ वटा हिमनदी तालहरूको पानीको सतह क्षेत्रमा कुनै महत्त्वपूर्ण परिवर्तन नदेखिएको जनाइएको छ। ती तालहरू समग्रमा स्थिर रहेको रिमोट-सेन्सिङ इमेजरीको तुलनात्मक विश्लेषणले देखाएको छ।
यद्यपि, मंगलबार बिहान ५:४५ बजे नेपालको समय अनुसार ड्रोनबाट खिचिएको तस्बिरले चोचेन नदीको क्रेटरमा जमेको धेरैजसो पानी बगेर निस्किसकेको देखाएको छ। तल्लो तटीय क्षेत्रमा नदीको बहाव सामान्य अवस्थामा फर्किसकेको रिपोर्टमा उल्लेख छ।
तर, क्रेटरको वरिपरि रहेको हिमनदी वा बरफको विशाल ढिक्का भत्किने जोखिम भने कायमै रहेको रिपोर्टले औंल्याएको छ।
