नेपालको रसुवामा नदी थुनिएर बनेको विशाल ताल फुट्ने उच्च जोखिम छ। चिनियाँ जलस्रोत मन्त्रालयले जुनसुकै बेला बाढी आउन सक्ने भन्दै तल्लो तटीय क्षेत्रलाई सतर्क रहन चेतावनी दिएको छ।
चिनियाँ सरकारी सञ्चारमाध्यम (सीसीटीभी) का अनुसार नेपालतर्फ चोजियान खोला र पुर्पुच्याङ्बु खोलाको दोभान नजिक पहिरोले नदी थुनिँदा ठूलो ताल बनेको छ। बिहीबार बिहानसम्म तालमा करिब २० लाख घनमिटर पानी जम्मा भइसकेको छ। आगामी तीन दिनमा थप ३० लाख घनमिटर पानी थपिने अनुमान छ।
चीनले भू-उपग्रह र राडार प्रविधिमार्फत तालको अवस्था नजिकबाट अनुगमन गरिरहेको छ। सम्भावित बाढीको गति र प्रभावबारे वैज्ञानिक गणना तथा सिमुलेसन गरी आपत्कालीन तयारीका लागि तथ्यांक विश्लेषण भइरहेको छ।
यसैबीच, नेपालतर्फको बाढी-पहिरोले चीनको तिब्बतस्थित ग्याइरोङ (केरुङ) नाकामा ठूलो विनाश निम्त्याएको छ। बिहीबार बिहानसम्म ३ जनाको मृत्यु पुष्टि भएको छ भने २ जनाको जीवितै उद्धार गरिएको छ। सीमा क्षेत्रबाट २६० विदेशी नागरिकसहित ५५८ जना अझै बेपत्ता छन्। खोजीका लागि चिनियाँ जनमुक्ति सेना, इन्जिनियरिङ टोली र हेलिकोप्टर परिचालन गरिएको छ।
यता नेपालमा भोटेकोसी बाढीका कारण मृत्यु हुनेको संख्या २७० पुगेको छ। प्रहरीका अनुसार चितवनमा १०८, पूर्वनवलपरासीमा ६२, पश्चिम नवलपरासीमा १५, धादिङमा २७, गोरखामा २०, नुवाकोटमा १२, तनहुँमा ९ र रसुवामा १७ जनाको शव फेला परेको छ। ५२ जनाको विभिन्न अस्पतालमा उपचार भइरहेको छ।
रसुवा, नुवाकोट, धादिङ र चितवनलगायत त्रिशूली नदी तटीय क्षेत्रका बासिन्दालाई थप सतर्क रहन आग्रह गरिएको छ।
