पूर्वप्रधानन्यायाधीश चोलेन्द्रशमशेर जबराविरुद्ध दायर रिट सर्वोच्च अदालतको संवैधानिक इजलासले खारेज गरिदिएको छ। यससँगै जबराले पूर्वपदाधिकारीका रूपमा पाउने पेन्सनपट्टालगायतका सुविधा प्राप्त गर्ने बाटो खुलेको छ। महाभियोग सिफारिस समितिको प्रतिवेदनपछि निलम्बनमा रहेका कारण उनले यसअघि कुनै सुविधा पाएका थिएनन्।
प्रधानन्यायाधीश डा. मनोजकुमार शर्मा तथा न्यायाधीशहरू सपना प्रधान मल्ल, कुमार रेग्मी, सारङ्गा सुवेदी र विनोद शर्मा सम्मिलित संवैधानिक इजलासले रिट खारेज गर्ने निर्णय सुनाएको हो। अन्तरिम आदेशका कारण जबराको सेवा अवधिमा प्रश्न उठेको थियो।
