अख्तियारले सिभिल अस्पतालका फार्मेसी इन्चार्ज दीपा ढुंगानासहित ८ जनाविरुद्ध ३ करोड रुपैयाँभन्दा बढीको भ्रष्टाचार मुद्दा दायर गरेको छ।
उनीहरूमाथि औषधि आपूर्ति नै नगरी बिल भरपाई मिलाएर ठूलो रकम भ्रष्टाचार गरेको आरोप छ। आयोगले जनही २ करोड ९१ लाख ३४ हजार ५४७ रुपैयाँ ३७ पैसा बिगो कायम गरेको छ।
मुद्दा दायर हुनेहरूमा फार्मेसी युनिट इन्चार्ज/फार्मेसी अधिकृत दीपा ढुङ्गाना, फार्मेसी सहायक लवेन्द्र कुँवर, वरिष्ठ फार्मेसी सहायक दिनेश पन्त, फार्मेसी सहायक दीपक सापकोटा, स्टोर किपर/वरिष्ठ फार्मेसी सहायक विनोद पोखरेल, स्टोर किपर/वरिष्ठ फार्मेसी सहायक शर्मिला श्रेष्ठ, स्टोर किपर/फार्मेसी सहायक केशव राज न्यौपाने र स्टोर किपर/फार्मेसी सहायक सन्दीप तिवारी रहेका छन्।
अनुसन्धानले अस्पतालको स्टोर शाखा र भर्याङमा करोडौँको म्याद गुज्रेका औषधि फालिएको अवस्थामा रहेको देखायो। कम्प्युटरमा स्टक देखाएको औषधि यथार्थमा मौज्दात नरहेको समेत खुलेको छ।
अख्तियारका अनुसार, फार्मेसी सेवा सञ्चालन निर्देशिका, २०७२ ले तोकेको वार्षिक ट्रायल ब्यालेन्स तयार भएन। म्याद सकिएका औषधि आपूर्तिकर्तालाई फिर्ता नगरी प्रतिस्थापन वा सोधभर्ना प्रक्रिया पनि अघि बढाइएको थिएन। म्याद गुज्रिएका औषधि स्टोरमा हुँदाहुँदै पनि, गलत जानकारी दिएर कम्पनीहरूको धरौटी रकम फिर्ता गराइएको थियो।
अस्पतालको मेडिकल डिभिजन प्रमुखको नेतृत्वमा गठित समितिको प्रतिवेदनका आधारमा उक्त हानी-नोक्सानीको निष्कर्ष निकालिएको थियो।
