जलवायु अनुकूलन कोषले नेपालका तीन परियोजनाका लागि कुल ४ करोड ४९ लाख २६ हजार ४५७ अमेरिकी डलर वित्तीय सहयोग स्वीकृत गरेको छ। कृषि, वन तथा पर्यावरण मन्त्रालयले पेस गरेका यी बहुआयामिक परियोजनाहरू कोषको ४७औँ बोर्ड बैठकबाट सर्वसम्मत रूपमा स्वीकृत भएका हुन्।
मन्त्रालयका अनुसार, स्वीकृत परियोजनामार्फत नेपालको पारिस्थितिक प्रणाली संरक्षण, बाढीपहिरोको पूर्वसूचना प्रणाली सुदृढीकरण तथा स्थानीय समुदायको जलवायु उत्थानशीलता अभिवृद्धिमा सहयोग पुग्नेछ। विश्वव्यापी रूपमा वित्तीय स्रोतको उच्च माग र कोषको सीमित स्रोतका बाबजुद नेपालका सबै परियोजना स्वीकृत हुनुलाई मन्त्रालयले महत्त्वपूर्ण उपलब्धिका रूपमा लिएको छ।
स्वीकृत परियोजना र विनियोजित रकम
- ग्रिन कोशी परियोजना: यसले प्रकृतिमा आधारित समाधानमार्फत कोशी क्षेत्रको पारिस्थितिक प्रणाली संरक्षण तथा जलवायु उत्थानशीलता अभिवृद्धि गर्नेछ। यसका लागि ९९ लाख २७ हजार ७५० अमेरिकी डलर स्वीकृत भएको छ। राष्ट्रिय प्रकृति संरक्षण कोषले यो परियोजना कार्यान्वयन गर्नेछ।
- हिन्दुकुश हिमालय पूर्वसूचना प्रणाली सुदृढीकरण परियोजना: हिमालय क्षेत्रमा बाढी तथा पहिरोको पूर्वसूचना प्रणालीलाई प्रविधिमैत्री र सुदृढ बनाउँदै समुदायको जलवायु अनुकूलन क्षमता बढाउने यसको उद्देश्य छ। यसका लागि ३ करोड अमेरिकी डलर स्वीकृत भएको छ। अन्तर्राष्ट्रिय एकीकृत पर्वतीय विकास केन्द्र (इसिमोड) ले यसको कार्यान्वयन गर्नेछ।
- लुम्बिनी प्रदेश स्थानीय नेतृत्व आधारित जलवायु कार्य परियोजना: लुम्बिनी प्रदेशका स्थानीय समुदायको नेतृत्वमा प्रकृतिमैत्री जलवायु कार्यमार्फत उत्थानशील समुदाय निर्माण गर्ने लक्ष्य यस परियोजनाको छ। यसका लागि ४९ लाख ९८ हजार ७०७ अमेरिकी डलर स्वीकृत भएको छ। संयुक्त राष्ट्रसंघीय मानव बस्ती कार्यक्रम (युएन ह्याबिटाट) यसको कार्यान्वयन निकाय हो।
जलवायु अनुकूलन कोषको ४७औँ बोर्ड बैठक अक्टोबर १९ देखि २३ सम्म बसेको थियो, जसमा नेपालका लागि बोर्ड सदस्य नरेश शर्माले सहभागिता जनाएका थिए। आगामी वैशाखमा हुने बोर्ड बैठकमा भोटेकोशी क्षेत्रमा विपद्पछिको व्यवस्थापन, पुनस्र्थापना तथा पुनर्निर्माणका लागि अन्तर्राष्ट्रिय जलवायु अनुकूलन वित्त परिचालन गर्ने विषयमा छलफल हुनेछ।
