नेपाली कांग्रेसले क्रियाशील सदस्यता अद्यावधिकका लागि असार ७ गतेसम्मको समयसीमा तोकेको छ। इन्टरनेटको पहुँच कम भएका हिमाली जिल्ला, विकट पहाडी पालिका तथा बारा र खोटाङ जिल्लाका लागि यो म्याद थपिएको हो। विदेशस्थित नेपाली जनसम्पर्क समितिहरूले असार १० गतेभित्र सदस्यता अद्यावधिक गर्नुपर्नेछ।
महामन्त्री प्रदीप पौडेलको संयोजकत्वमा बसेको सदस्यता व्यवस्थापन केन्द्रीय समितिको बैठकले अनलाइनमार्फत प्रविष्ट भएका फारामहरू वडा तहबाट असार ५ गतेभित्र अनुमोदन गर्न निर्देशन दिएको छ। समितिले क्रियाशील सदस्यता फाराम र अनलाइनमार्फत नयाँ सदस्यता वितरणको कार्य २०८३ असार २० गतेसम्म सञ्चालन हुने जनाएको छ।
हालसम्म डिजिटल प्रणालीमा ७ लाख ८२ हजार २०९ क्रियाशील सदस्य आबद्ध छन्। यसमध्ये ६ लाख ८७ हजार ९३१ सदस्यको विवरण प्रणालीमा प्रविष्ट भइसकेको छ। ५ लाख ३८ हजार ६२२ सदस्यले एनसीआईडी प्राप्त गरेका छन्। १ लाख ४९ हजार ३०९ सदस्यको फाराम वडा तहबाट प्रमाणीकरण प्रक्रियामा छ। कांग्रेसले डिजिटल प्रणालीलाई संगठन सुदृढीकरणको आधार बनाउने लक्ष्य लिएको छ।
यसैबीच, नेपाली कांग्रेसको १५औँ महाधिवेशन प्रक्रियामा भाग लिन क्रियाशील सदस्यले निर्धारित शुल्क बुझाउनुपर्ने भएको छ। कार्यवाहक मुख्यसचिव कृष्णप्रसाद दुलालका अनुसार शुल्क नबुझाउने सदस्यलाई यथाशीघ्र बुझाउन सम्बन्धित सभापतिहरूलाई निर्देशन दिइएको छ। वडाबाट नवीकरण वा अद्यावधिक गर्न छुटेका सदस्यहरूले असार २० गतेभित्र केन्द्रीय कार्यालयमा निवेदन दिन सक्नेछन्।
