कांग्रेस सभापति गगन थापा र नेता डा. शेखर कोइरालाबीच शनिबार भएको भेटले पार्टीभित्रको आन्तरिक विवाद समाधानको प्रयासलाई जोड दिएको छ।
नेता डा. कोइरालाले पार्टीलाई एकढिक्का बनाउन आफू जुनसुकै त्याग गर्न तयार रहेको बताए। सभापति थापाले पनि पार्टी एकताकै पक्षमा रहेको प्रस्ट पारे।
डा. कोइरालाको सचिवालयका अनुसार दुई शीर्ष नेताबीच पार्टीभित्रका समस्या र तिक्तता समाधानमा कुराकानी केन्द्रित थियो।
डा. कोइरालाले देश, लोकतन्त्र र राष्ट्रियता अप्ठ्यारोमा रहेकाले कांग्रेस एकढिक्का हुनुको विकल्प नभएको बताए।
उनले पार्टी एकता जोगाउन आफूबाट जे त्याग गर्नुपर्छ, त्यो गर्न तयार रहेको धारणा राखे।
थापाले पार्टीभित्र विभाजन नभई एकताकै पक्षमा रहेको बताए। आन्तरिक समस्या संवादबाटै समाधान गर्न सकिने उनको जवाफ थियो।
भेटमा आन्तरिक राजनीतिका अलावा देशमा निम्तिएको प्राकृतिक विपद्बारे पनि छलफल भयो।
भदौ १० गते रसुवामा आएको विनाशकारी बाढीले रसुवा, नुवाकोट, धादिङमा पुर्याएको क्षतिबारे समीक्षा भयो।
