दैलेखको चामुण्डाबिन्द्रासैनी नगरपालिका-९, खाडा घर भएका २७ वर्षीया कमला रावल र उनका ९ वर्षीय छोरा आयुष रावलको शंकास्पद विषाक्तताका कारण मृत्यु भएको छ। उपचारका क्रममा बाटोमै छोराको र प्रदेश अस्पताल सुर्खेतमा आमाको मृत्यु भएको हो।
प्रहरीका अनुसार, साउन ३ गते राति आमा-छोरा आफ्नै घरको माथिल्लो तलाको कोठामा सुतेका थिए। भोलिपल्ट बिहान उठ्दा दुवैलाई रिंगटा लाग्ने र शरीर झमझमाउने जस्ता समस्या देखिएपछि उपचारका लागि स्थानीय शाही मेडिकल लगिएको थियो।
उपचारका लागि लैजाने क्रममा ९ वर्षीय आयुष रावलको साउन ४ गते बिहान बाटोमै मृत्यु भएको शाही मेडिकलले जनाएको छ। कमला रावललाई जिल्ला अस्पताल दैलेखमा सामान्य उपचारपछि थप उपचारका लागि कर्णाली प्रदेश अस्पताल सुर्खेत रिफर गरिएको थियो। चिकित्सकले प्रारम्भिक रूपमा सर्पदंशसँग मिल्दोजुल्दो लक्षण देखिएको अनुमान गरेका थिए।
घटनाबारे थप अनुसन्धानका लागि प्रहरी चौकी जम्बुकाध र पालतडाबाट प्रहरी टोली घटनास्थलमा पुगेको छ। इलाका प्रहरी कार्यालय दुल्लुबाट प्रहरी निरीक्षक सरोज पौडेलको नेतृत्वमा थप टोली परिचालन गरिएको छ।
यसैबीच, कर्णाली प्रदेश अस्पतालमा भेन्टिलेटरमा राखेर उपचार भइरहेकी कमला रावलको पनि साउन ६ गते बिहान उपचारकै क्रममा मृत्यु भयो।
घटनाको वास्तविक कारण खुल्न बाँकी रहेकाले प्रहरीले विस्तृत अनुसन्धान अघि बढाएको छ। प्रारम्भिक रूपमा सर्पदंश वा अन्य कुनै विषाक्त कारण हुन सक्ने आशंका गरिए पनि आधिकारिक निष्कर्ष भने अनुसन्धानपछि मात्र आउने प्रहरीको भनाइ छ।
