घाटामा रहेको दुग्ध विकास संस्थान (डिडिसी) का कर्मचारीले वार्षिक ७८ लाख रुपैयाँ बराबरको दूध र घिउ सित्तैमा उपभोग गर्दै आएको खुलासा भएको छ। कृषि तथा पशुपन्छी विकासमन्त्री गीता चौधरीले यो सुविधा तत्काल रोक्न निर्देशन दिएकी छन्।
आजको छलफलमा मन्त्री चौधरीले यो निर्देशन दिइन्। कर्मचारीले नियमविपरीत दैनिक दूध र मासिक घिउ सित्तैमा लिने गुनासो थियो।
मन्त्री चौधरीको निर्देशन कार्यान्वयनपछि संस्थानको वार्षिक ७८ लाख रुपैयाँ जोगिने उनको सचिवालयले जनाएको छ। “संस्थान घाटामा छ। किसानले भुक्तानीलगायत समस्या भोगिरहेका छन्, तर कर्मचारीले वार्षिक लाखौँ रकमको दूध र घिउ सित्तैमा लिने कुरा राम्रो होइन। त्यसैले यस्तो कार्य तत्काल रोकौँ, संस्थानको हितका लागि गम्भीर भएर काम गरिनुपर्छ,” निर्देशनका क्रममा मन्त्री चौधरीले भनिन्।
जोगिएको रकम किसानको बक्यौता भुक्तानीमा खर्च हुनेछ। दुग्ध उत्पादन वृद्धि कार्यक्रममा पनि यो रकम उपयोग गरिनेछ। मन्त्रालयले यो जानकारी दियो।
