दमक–३ स्थित हंसे दुम्से दुग्ध डेरी तथा पशु उत्पादन तथा सङ्कलन सहकारी संस्थाले दूध बिक्रीबापतको रकम लामो समयदेखि भुक्तानी नगर्दा करिब दुई सय दुग्ध किसान आर्थिक सङ्कटमा परेका छन्।
प्रारम्भिक रूपमा ६० किसानको रु २२ लाख ६५ हजार २०० बक्यौता प्रमाणित भइसकेको छ। पीडितका अनुसार अझै धेरै किसानको रकम भुक्तानी हुन बाँकी छ। भुक्तानी नहुँदा किसानलाई पशुका लागि दाना खरिद र घरखर्च सञ्चालनमा समस्या भएको छ।
किसानले सहकारीमा आर्थिक अनियमितताको आरोप लगाउँदै अख्तियार दुरुपयोग अनुसन्धान आयोग, इटहरीमा उजुरी दिएका छन्। उजुरीमा वर्तमान अध्यक्ष हिमालयप्रसाद दाहाल, पूर्वअध्यक्ष गेहनाथ पोखरेल, पुष्प ढकाल र शान्तिराम भट्टराईलगायत पदाधिकारीमाथि छानबिन गरी कारबाही माग गरिएको छ।
सहकारीका अध्यक्ष हिमालयप्रसाद दाहालले किसानको दूध बिक्रीको रकम तिर्न बाँकी रहेको स्वीकारे। उनले संस्थाको आर्थिक अवस्था अघिल्लो व्यवस्थापनदेखि नै कमजोर भएकाले समस्या आएको बताए। ‘हामी फरार भएका छैनौँ। जग्गाजमिन र सम्पत्ति बिक्री गरेर भए पनि बक्यौता भुक्तानी गर्छौं,’ दाहालले भने।
दमक नगरपालिकाका सहकारी शाखा प्रमुख इच्छाराम चम्लागाईंका अनुसार सहकारीले पछिल्लो दुई वर्षदेखि नवीकरण गरेको छैन। साधारण सभा र वित्तीय अवस्थाबारे नगरपालिकालाई नियमित जानकारी आएको छैन। संस्थाको अवस्थाबारे अध्ययन भइरहेको छ।
