प्रतिनिधिसभाकी उपसभामुख रुबी कुमारी ठाकुरले प्रधानन्यायाधीश सिफारिस कार्यक्षमता मूल्यांकनमा आधारित रहेको स्पष्ट पारेकी छन्। यसमा कुनै किन्तु–परन्तुको आवश्यकता नभएको उनले बताइन्।
उपसभामुख ठाकुरले न्याय प्रणालीप्रति जनतामा लामो समयदेखि गुनासो रहेको उल्लेख गरिन्। मुद्दा टुंगिन अत्यधिक समय लाग्नु गम्भीर विषय भएको उनको भनाइ छ।
नियुक्ति कार्यक्षमता र योग्यतामा आधारित हुनुपर्छ। दल वा पार्टीको प्रभावमा नियुक्ति हुँदा परिणाम नकारात्मक देखिन्छ, उनले भनिन्।
राज्यका हरेक अंग देश, जनता र राज्यको हितका लागि काम गर्नुपर्छ। संविधान, कानुन र जनहित सर्वोपरि हुनुपर्नेमा उनले जोड दिइन्।
उनले आफ्नो पोस्टमा लेखेकी छन्: “निष्पक्ष, सक्षम र जिम्मेवार न्याय प्रणाली नै लोकतन्त्रको वास्तविक आधार हो।”
उपसभामुख ठाकुरले आफ्नो धारणा नेपाली र मैथिली भाषामा सामाजिक सञ्जाल फेसबुकमार्फत सार्वजनिक गरेकी थिइन्। उनले पोस्टसँगै ‘च्याट जीपीटी’को स्क्रिनसट राखेकी छन्। यो स्क्रिनसट प्रधानन्यायाधीशका उम्मेदवार न्यायाधीशबारेको टिप्पणी थियो।
