कैलालीको धनगढी उपमहानगरपालिका–३ का ३५ वर्षीय ज्योति चौधरीको शरीरमा पेट्रोल छर्केर आगो लगाउने प्रयासपछि उपचारका क्रममा मृत्यु भएको छ। काठमाडौँ लैजाँदै गर्दा धादिङमा उनको ज्यान गएको जिल्ला प्रहरी कार्यालय कैलालीले जनाएको छ।
साउन ९ गते साँझ करिब ७:३० बजे चौधरीले घरभित्रै शरीरमा पेट्रोल छर्केर आगो लगाएका थिए। घटनालगत्तै उद्धार गरी सेती प्रादेशिक अस्पताल धनगढी पुर्याइएको थियो।
चिकित्सकका अनुसार चौधरीको शरीरको करिब ६० प्रतिशत भाग जलेको थियो। अवस्था गम्भीर रहेपछि प्रारम्भिक उपचारपछि उनलाई थप उपचारका लागि नेपालगञ्जको भेरी अस्पताल रिफर गरिएको थियो।
तर, परिवारले थप उपचारका लागि काठमाडौँ लैजाने निर्णय गरेका थिए। काठमाडौँ लैजाने क्रममा धादिङ पुग्दा उनको मृत्यु भएको प्रहरीले जनाएको छ।
आत्मदाहको प्रयास गर्नुको कारण भने हालसम्म नखुलेको र घटनाबारे प्रहरीले थप अनुसन्धान गरिरहेको छ।
