कृषि सामग्री कम्पनी लिमिटेड, धनुषाले दोस्रो चरणमा नियमित कोटाको रासायनिक मल वितरण सुरु गरेको छ। धनुषा र महोत्तरी जिल्लामा धान रोपाइँ अन्तिम चरणमा पुगेका बेला डिएपी र युरिया मलको वितरण सुरु भएको हो।
मधेस प्रदेश भूमि व्यवस्था, कृषि तथा सहकारी मन्त्रालयको साउन ११ गतेको निर्णय अनुसार धनुषाका लागि ९७९ मेट्रिक टन डिएपी र ९२६ मेट्रिक टन युरिया, तथा महोत्तरीका लागि ९३१ मेट्रिक टन डिएपी र ८८० मेट्रिक टन युरिया वितरण गरिनेछ। कृषि सामग्री कम्पनी लिमिटेड जनकपुरधामका सूचना अधिकारी बेचन साहले यो जानकारी दिए।
सूचना अधिकारी साहका अनुसार वीरगञ्जस्थित प्रादेशिक कार्यालयबाट मल ढुवानी सुरु भएसँगै स्थानीय तहहरूको सिफारिसमा मल वितरण थालिएको छ।
मल वितरण सुरु भएसँगै जिल्लामा केही समयदेखि रहेको मलको अभाव विस्तारै हट्दै गएको छ। साउनको दोस्रो साता थप युरिया र डिएपी मल प्राप्त भएकाले अभाव टरेको हो।
हाल कृषि सामग्री कम्पनी लिमिटेड, जनकपुरधाम धनुषामा २.६ मेट्रिक टन युरिया मौज्दात छ। सुनसरी र सिरहामा भएको घटनाका कारण स्थानीय प्रशासनले जारी गरेको कर्फ्यु र निषेधाज्ञाले मल ढुवानीमा केही समस्या आए पनि अहिले ढुवानी सहज भएको छ।
