धरान उपमहानगरपालिका-१० का २८ वर्षीय जीवन भुजेलको सामान्य विवादमा छुरा प्रहारबाट मृत्यु भएको छ।
आज धरान उपमहानगरपालिका-१९ मा स्थानीय युवाहरूबीच सामान्य विवाद भयो। विवादले उग्र रूप लिँदा धरान-१० का २८ वर्षीय जीवन भुजेलमाथि छुरा प्रहार भयो। जिल्ला प्रहरी कार्यालय सुनसरीले उनको मृत्यु भएको पुष्टि गर्यो।
गम्भीर घाइते भुजेललाई धरानस्थित बिपी कोइराला स्वास्थ्य विज्ञान प्रतिष्ठान लगियो। त्यहाँ उपचार सम्भव नभएपछि उनलाई विराटनगरस्थित विराट नर्सिङहोम सारियो।
विज्ञापन
विराट नर्सिङहोममा उपचारका क्रममा आज दिउँसो भुजेलको मृत्यु भयो। जिल्ला प्रहरी कार्यालय सुनसरीका प्रमुख केशवकुमार थेबेले यो जानकारी दिए।
घटनामा छुरा प्रहार गर्ने धरान उपमहानगरपालिका-१९ का अर्जुन विश्वकर्मा फरार छन्। प्रहरीले उनको खोजी तीव्र पारेको छ र थप अनुसन्धान भइरहेको जनाएको छ।
