पूर्व गृहमन्त्री सुधन गुरुङले गोप्य सूचना चुहाउने जोसुकैलाई कारबाही हुने चेतावनी दिएका छन्।
उनले मंगलबार सामाजिक सञ्जाल फेसबुकमार्फत राज्यले सुम्पिएको गोपनीयतामाथि जानाजान विश्वासघात गर्ने जोसुकैलाई कानुनको कठघरामा ल्याउने बताएका हुन्। यो भनाइ संवेदनशील सूचना चुहावटको आरोपमा सशस्त्र प्रहरीका अतिरिक्त महानिरीक्षक (एआईजी) वंशीराज दाहाल निलम्बनमा परेलगत्तै आएको हो।
गुरुङले गृह मन्त्रालय र मातहतका निकायमा जिम्मेवारीमा रहेका कुनै पनि पदाधिकारी वा कर्मचारीले आफ्नो पदीय हैसियत भुलेर गोप्य वा संवेदनशील सूचना अनाधिकृत व्यक्ति वा निकायलाई चुहाउने प्रवृत्ति लामो समयदेखि नियालिरहेको उल्लेख गरेका छन्। उनले राज्यको संवेदनशील सूचना कसैको निजी सम्पत्ति नभई सार्वजनिक जिम्मेवारी भएको स्पष्ट पारेका छन्। पदले सूचनामा पहुँच दिए पनि त्यसको दुरुपयोग गर्ने अधिकार नदिने उनको भनाइ छ।
गृह मन्त्रालयले सशस्त्र प्रहरी बल, नेपालका एआईजी वंशीराज दाहाललाई असोज १९ गते (सोमबार) सुरक्षासँग सम्बन्धित संवेदनशील सूचना चुहावट गरेको आरोपमा निलम्बन गरेको थियो। दाहालमाथि पदीय आचरणविरुद्धका कार्य गरेको र संवेदनशील सूचना चुहावट गरेको गृह मन्त्रालयको आरोप छ।
उनलाई पूर्वप्रधानन्यायाधीश चोलेन्द्रशमशेर राणालाई पक्राउ गरेर काठमाडौं उपत्यका अपराध अनुसन्धान कार्यालय, टेकुमा ल्याइएको राति नै अनुमति नलिई भेट्न गएको आरोपसमेत लागेको छ। गृह मन्त्रालयले दाहालमाथि लागेको आरोपको छानबिन गर्न जाँचबुझ अधिकृत तोकेर तीन दिनभित्र प्रतिवेदन पेस गर्न निर्देशन दिएको छ।
जाँचबुझ समितिको प्रतिवेदनका आधारमा दाहालमाथि थप कारबाही अघि बढ्नेछ। निलम्बनको निर्णयसँगै दाहालको पदावधि थपका लागि सशस्त्र प्रहरी मुख्यालयले गरेको सिफारिससमेत अन्योलमा परेको छ। दाहालले चुहावट गरेको भनिएको संवेदनशील सूचनाको विस्तृत विवरण भने अझै सार्वजनिक भएको छैन।
यसअघि: गृहमन्त्री सुधन गुरुङको चेतावनी: संवेदनशील सूचना चुहाउनेलाई कानूनी दायरामा ल्याइने
