नक्कली भुटानी शरणार्थी प्रकरणमा काठमाडौं जिल्ला अदालतले मंगलबार टेकनाथ रिजाललाई दुई वर्ष, मुख्य योजनाकार केशवप्रसाद दुलाल र सानु भण्डारीलाई चार वर्ष कैद सजाय सुनाएको छ।
अदालतका न्यायाधीश तेजबहादुर खड्काको इजलासले टेकनाथ रिजाललाई सरकारी लिखत कीर्तेमा एक वर्ष कैद र १० हजार रुपैयाँ जरिबाना तोकेको छ। उनलाई ठगी मुद्दामा थप एक वर्ष कैद र १० हजार रुपैयाँ जरिबाना तोकिएको छ। रिजालले कुल दुई वर्ष कैद र २० हजार रुपैयाँ जरिबाना भुक्तान गर्नुपर्नेछ।
प्रकरणका मुख्य योजनाकार केशवप्रसाद दुलाल र सानु भण्डारीलाई समान चार वर्ष कैद र ४० हजार रुपैयाँ जरिबानाको सजाय तोकिएको छ। उनीहरूलाई सरकारी लिखत कीर्ते कसुरमा दुई वर्ष कैद र २० हजार जरिबाना तथा ठगीमा दुई वर्ष कैद र २० हजार जरिबाना सुनाइएको हो।
दुलाल र भण्डारीलाई संगठित अपराधमा तीन वर्ष कैद र ३० हजार जरिबाना, तथा राज्यविरुद्धको कसुरमा एक वर्ष कैद र १५ हजार जरिबाना पनि तोकियो। सबै कसुरको एकीकृत सजायतर्फ उनीहरूलाई कुल चार वर्ष कैद र ४० हजार जरिबाना सुनाइएको जिल्ला अदालतले जनाएको छ।
मुद्दाको सुरुवातदेखि नै पुर्पक्षका लागि थुनामा रहेका दुलाल र भण्डारीसहित प्रकरणमा दोषी ठहरिएका १६ जनाविरुद्ध अदालतले सजाय तोकेको छ।
