नुवाकोटको विदुर–१०, बेत्रावतीबाट सशस्त्र प्रहरी बल नेपाल र नेपाल प्रहरीको संयुक्त उद्धार टोलीले ६४ वर्षीया चन्द्रिका श्रेष्ठको उद्धार गरेको छ। प्रधानमन्त्री बालेन्द्र शाहले बाढी प्रभावित क्षेत्रका ज्येष्ठ नागरिकलाई सरकारले अस्थायी आश्रय, स्वास्थ्य सेवा, राहत तथा आवश्यक सहयोग उपलब्ध गराइरहेको बताए।
देवीघाट ज्येष्ठ नागरिक संरक्षण तथा अध्ययन प्रतिष्ठानका ७ जनालाई काठमाडौंको म्हैपीस्थित नेपाल सिनियर केयरमा सारिएको छ। अन्य १७ जनालाई नुवाकोटको इनारपाटीस्थित कृष्णप्रणामी मन्दिरमा अल्पकालीन आश्रय दिइएको छ। उनीहरूका लागि ह्वीलचियर, वाकर, स्वास्थ्य परीक्षण र मनोसामाजिक परामर्शको व्यवस्था गरिएको छ।
प्रधानमन्त्री शाहले अस्थायी बसाइ छोटो पार्दै ज्येष्ठ नागरिकका लागि सुरक्षित स्थायी बसोबासको व्यवस्था मिलाउने प्रतिबद्धता जनाए। बाढीमा आफन्त गुमाएका नागरिकको आक्रोशलाई पीडाको अभिव्यक्ति ठान्नुपर्ने उनको भनाइ छ। पीडितमाथि अनावश्यक टिप्पणी गर्नेलाई सरकारले कठोर कारबाही गर्ने चेतावनी उनले दिए।
खोज तथा उद्धारमा खटिएका सुरक्षाकर्मीप्रति प्रधानमन्त्री शाहले धन्यवाद व्यक्त गरे। “आदरणीय आमाबुबाहरू, हामीमाथि भरोसा राख्नुहोस्,” उनले भने।
