देशका २५ जिल्लामा बाढी तथा पहिरोको उच्च जोखिम छ। लगातारको वर्षाले खोलानालामा जलसतह बढेको छ। पहाडी क्षेत्रमा पहिरो खस्ने क्रम बढेको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले ७७ जिल्लालाई रातो, सुन्तला र पहेँलो गरी तीन तहमा वर्गीकरण गरेको छ। २५ जिल्ला रातो (उच्च जोखिम), २९ जिल्ला सुन्तला (जोखिमयुक्त) र २३ जिल्ला पहेँलो (सतर्कता) सूचीमा छन्।
रातो सूचीमा रहेका जिल्लामा दिउँसो र राति दुवै समयमा सवारीसाधन सञ्चालन रोक्न सुझाव दिइएको छ। सुन्तला सूचीका २९ जिल्लामा राति सवारी रोक्नुपर्नेछ। दिउँसोको अवस्था हेरेर मनसुन प्रतिकार्य कमाण्ड पोष्टले निर्णय लिनेछ। पहेँलो सूचीका २३ जिल्लामा सतर्कता अपनाउन भनिएको छ।
अत्यावश्यक अवस्थामा बाहेक जोखिमयुक्त सडकमा यात्रा नगर्न आग्रह गरिएको छ।
