भोटेकोशी बाढी जस्ता प्राकृतिक विपद्मा परी चेक, एटीएम कार्ड, मोबाइल र अन्य आवश्यक कागजात गुमाएका पीडितलाई सहज बैंकिङ सेवा दिन नेपाल राष्ट्र बैंकले निर्देशन दिएको छ।
राष्ट्र बैंकको बैंक तथा वित्तीय संस्था नियमन विभागले मङ्गलबार सूचना जारी गरी सम्पूर्ण बैंक तथा वित्तीय संस्थालाई विपद्पीडित ग्राहकको पहिचान यकिन गरी तत्काल सहजीकरण गर्न भनेको हो।
विपद्का बेला नागरिकले कागजात र बैंकिङ सामग्री गुमाउने भएकाले वित्तीय सेवा लिन सास्ती नहोस् भन्ने उद्देश्यले केन्द्रीय बैंकले यो व्यवस्था ल्याएको हो।
नयाँ निर्देशनअनुसार बैंक तथा वित्तीय संस्थाले आफ्नै अभिलेखमा रहेको ग्राहकको पुरानो हस्ताक्षर, फोटो र विवरणका आधारमा पहिचान सुनिश्चित गरी सेवा दिन सक्नेछन्।
यसैबीच, रसुवाको भोटेकोशी बाढीबाट प्रभावितलाई कोरियाली नागरिकले प्रधानमन्त्री प्रकोप उद्धार कोषमा १५ हजार डलर (नेपाली २२ लाख ८० हजार रुपैयाँ) सहयोग गरेका छन्।
बाढीबाट प्रभावित नागरिक तथा समुदायको राहत, पुनर्स्थापना र सहयोगमा योगदान पुर्याउने उद्देश्यले उक्त रकम प्रदान गरिएको हो।
त्यस्तै, जय नेपाल पार्टीले भोटेकोशी र त्रिशूली नदी तटीय क्षेत्रको बाढीबाट प्रभावितको राहत तथा उद्धारका लागि ६ लाख ५१ हजार ६ सय ७६ रुपैयाँ सहयोग गरेको छ। पार्टीले उक्त रकम बुधबार प्रधानमन्त्री दैवी प्रकोप उद्धार कोषमा जम्मा गरेको हो।
