सर्लाही । मौरिससमा रोजगारी लगाइदिने भन्दै ठगीएको १२ लाख रुपैयाँ जिल्ला प्रशासन कार्यालय सर्लाहीको पहलमा पीडितहरूले फिर्ता पाएका छन् ।
ईश्वरपुर नगरपालिका १ का राकेश महतो (नथुनी महतो) ले विभिन्न व्यक्तिबाट रकम लिएको बताइएको छ ।
लामो समयसम्म विदेश नपठाएपछि र रकम फिर्ता नगरेपछि पीडितहरूले जिल्ला प्रशासन कार्यालयमा उजुरी दिएका थिए ।
राकेशले मलंगवा नगरपालिका १० का राजकुमार रौनियार र अजय ठाकुर, ईश्वरपुर नगरपालिका ६ का पहलाद सहनी तथा ब्रह्मपुरी गाउँपालिका ६ का सन्दीप यादवबाट मौरिसस पठाउने प्रलोभनमा कुल १२ लाख रुपैयाँ असुलेका थिए ।
उजुरी परेपछि जिल्ला प्रशासन कार्यालय सर्लाहीले दुवै पक्षलाई बोलाएर छलफल गराएको थियो । प्रशासनको रोहवरमा राकेशका बुबा राजेन्द्र महतोले पीडितहरूबाट लिइएको सम्पूर्ण १२ लाख रुपैयाँ फिर्ता गरेका हुन् ।
वैदेशिक रोजगारीका नाममा रकम असुल्ने र विदेश नपठाउने घटना बढिरहेका बेला प्रशासनको पहलमा पीडितले रकम फिर्ता पाउनु राहतको विषय बनेको छ ।
जिल्ला प्रशासन कार्यालयले वैदेशिक रोजगारीमा जानुअघि सम्बन्धित व्यक्ति वा संस्थाको आधिकारिकता जाँच गर्न आग्रह गरेको छ ।
